Prezident – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev XI halyqaralyq "Aibyn" áskeri-patriottyq jastar jiynynyń ashylý rásimine qatysty, dep habarlaidy Dalanews.kz.
Slet qos ataýly dataǵa – Uly Jeńistiń 80 jyldyǵyna jáne qazaq halqynyń batyr qyzy Áliia Moldaǵulovanyń 100 jyldyq mereitoiyna arnalady.
Prezidenttiń aitýynsha, qazirgi qubylmaly, bulyńǵyr zamanda biz osy tarihi aqiqatqa adal bolýymyz kerek, zulmat soǵystyń qasiretti sabaǵyn umytpaýymyz qajet.
"Jastar beibit zamannyń qadirin túsinýge tiis. Jyl ótken saiyn jahandyq shielenister órship, memleketter arasynda qaqtyǵystar jiilegenin kórip otyrsyzdar. Qazirgi asa kúrdeli ýaqytta elderimiz arasyndaǵy túsinistik, ózara senim men kelisim óte mańyzdy ról atqarady. Búgingi jarystar bizdiń sheteldermen kópjaqty bailanystarymyzdy keńeitýge úles qosady", – dedi Qasym-Jomart Toqaev.
Memleket basshysy ásker qatarynda bolý abyroily mindet ekenin atap ótip, elimiz óskeleń urpaqtyń áskeri-patriottyq tárbiesine basa mán beretinin jetkizdi.
"Qýatty Armiia – táýelsizdik tiregi, qarqyndy damý kepili. Búgin sapta turǵan sarbazdar – naǵyz otanshyl, batyl, myqty azamattar. Qazaqstan Armiiasynyń keleshegi sizderdiń qoldaryńyzda! Ádiletti jáne Qaýipsiz Qazaqstandy quratyn da sizder. Men Joǵarǵy Bas qolbasshy retinde elimizdiń bilimdi, adal, ozyq jastaryna senemin! Aldaǵy kúnderi sizderdiń qanshalyq kúshti ári epti ekenderińiz synalady. Áskeri qyzmettiń qandai bolatynyn sezinip, zamanaýi armiianyń ozyq tehnologiialarymen tanysasyzdar. Naǵyz jaýynger tabandy eńbek, qatań tártip pen jaýapkershilik qana jeńiske jetkizetinin biledi. Taktikalyq oiyndar kezinde sizderge batyldyq qajet bolady. Komandamen uiymdasa áreket etý, bir-birińe kómektesý talap etiledi. Búgin osy jiynda Qazaqstannyń namysyn "Jas sarbaz" áskeri-patriottyq qozǵalysynyń eń úzdik músheleri qorǵaidy. Jastarymyz jarysqa laiyqty deńgeide qatysyp qana qoimai, ózderin osy eldiń qonaqjai ári keńpeiil iesi retinde kórsetetinine senimdimin. Osy jiynnan jańa daǵdy úirenip, adal dos taýyp, keremet ásermen oralýlaryńyzǵa tilektespin. Barshańyzǵa sáttilik tileimin!" – dedi Qasym-Jomart Toqaev.
