Batysqazaqstandyq sportshylar, mádeniet jáne óner qairatkerleri referendýmǵa belsendi qatysyp, ózderiniń azamattyq ustanymdaryn kórsetýde. Solardy biri – Parijde ótken olimpiada oiyndarynyń qatysýshysy, kanoede esý sheberi Mariia Brovkova. El erteńine bei-jai qaramai, búgingi referendýmda óz tańdaýyn jasaǵan jas sportshy ár azamattyń daýysy mańyzdy ekenin aitady.
18 jasynda álem chempiony, álem kýboginiń iegeri atanǵan Mariia ózi turatyn qala mańyndaǵy Krýgloozernoe orta mektebindegi ýchaskede daýys berdi.
– Búgin bizdiń elimiz úshin tarihi mańyzdy kún. Bárimizdiń basty maqsatymyz ózimizdiń bolashaǵymyz úshin, táýelsiz elimizdiń órkendeýine osy referendýmǵa daýys berý. Elimiz tarihynda osyndai mańyzdy sharadan tys qalýǵa bolmaidy. Sebebi Qazaqstan bizdiń Otanymyz, ortaq mekenimiz, al onyń bolashaǵyna qatysty salmaqty sheshimdi qabyldaýdy halyqqa tapsyrǵan eken, eshqaisymyz shet qalmai, bir aýyzdan daýys berýimiz kerek, – deidi sportshy.
Aita keteiik, Parij olimpiadasynan soń Mariia Brovkova Ózbekstanda ótken álem chempionatynda qola júldeger atandy.
