«Sharanyń maqsaty bilim mazmunynyń jańarýymen qatar, oqytýdyń ádis-tásilderi men ártúrli quraldaryn qoldanýdyń tiimdiligin arttyrý. Kásibi bilim, bilik, daǵdyny damytý, pedagogtiń jalpy mádeni damýyn, onyń tulǵalyq kózqarasyn jáne kásibi mańyzdy sapalaryn jetildirý», – deidi alǵy sóz alǵan mektep direktory Quralai Oshanova.
Sharaǵa qonaq retinde jýrnalist Murat Ospanov, Diana Snegina, «Atamura» korporatsiiasynyń direktory, IT maman Alira Ten jáne aýdandyq bilim bóliminiń mamandary qatysty. Eń qyzyǵy osy qonaqtardan bir top jasaqtalyp olar mektep oqýshylarynan quralǵan komandamen intellektýaldy oiyn oinady.
Odan soń mektep direktorynyń orynbasary Dinara Muratbekqyzy «Jasandy intellektiniń chat bottaryn pedagog jumysynda qoldaný. Shveitsariia mysalynda» taqyrybynda baiandama jasap, Shveitsariiada is-saparmen bolǵan kezde alǵan qundy aqparattarymen bólisti.
Artynsha mekteptiń daryndy oqýshylary da jasandy intellekti týraly, ózderiniń jobalary jaily sóz sóiledi. Sonyń ishinde German Arsenii jasandy intellekti kúndelikti qalai qoldanyp júrgeni týraly bólisse, 11 synyp oqityn jas ónertapqysh Mádi Beisebaev «MO-kap ustaý jańa tehnologiiasy» jobasy boiynsha ózi jasaǵan robot-qoldy tanystyrdy. Taǵy bir mektep oqýshysy Diiar Ýshýrov qazir telefonǵa arnalǵan qosymsha jasap jatsa, ekinshi bir daryndy shákirt Matvei Rybalkin baǵdarlamalaý tilin oilap tapqan. Jas ǵalymdar men zertteýshiler osy seminarda qanshama jylyn arnap jasaǵan jobalaryn, olardyń mańyzy men jumys printsipin tanystyrdy. Olar osy jumystarymen talai baiqaýda júldeli oryn alyp ta úlgeripti.
«Jiyn sońynda kelgen qonaqtar oqýshylardyń suraqtaryna jaýap berdi. Olar JI-diń bolashaǵy men adamzat ómirindegi róli týraly talqylap, oilaryn ortaǵa saldy. Oqýshylar JI adam ómirin jeńildetýge arnalǵan qural degen ideiany alǵa tartsa, qonaqtar men mamandar JI adam sekildi abstraktili bola almaidy, biraq onyń kúndelikti ómirde beretin igilikteri kóp degendi aitady. Qorytyndy pikirdi bilý úshin arnaiy «kiýar kod» ornattyq. Qatysýshylar osylaisha onlain formatta óz áserlerimen bólisti. Osyndai keremet bastamany usynys retinde tastaǵan ideia avtory – direktorymyz Quralai Oshanova. Shara óz maqsatyna jetti, talqylaý da, tanystyrý da, jańa aqparat alý da, oinaý da, oilaný da boldy», – deidi shara uiymdastyrýshylarynyń biri Maigúl Baqytbekqyzy.
