Jýyrda aýyl sharýashylyǵy vitse-ministri qyzmetinen bosap, Jambyl óńirine qyzmetke barǵan Ábilqaiyr Tamabek ózin Astanadan ketirgen kim ekenine jaýap berdi dep habarlaidy Dalanews.kz.
Ábilqaiyr Tamabek ministrliktegi qyzmeti kezinde eń jas vitse-ministr atanǵan edi. Ol qyzmette bulai tez kóterilýiniń artynda kim turǵanyna jaýap berdi. Sózine súiensek, eńbegi elengen, baǵalanǵan.
"Men ministrlikten jumys bastaǵanmyn. Eń alǵashqy sarapshy boldym, bas sarapshy da boldym. Odan keiin basqarma basshysy bolyp jumys istedim. Sóitip júrip akademiiada oqydym. Odan Prezident kadrlyq rezervine tapsyrdym. El qatarly úsh júzdikke ótken azamattarǵa usynǵandai, maǵan da usynystar berdi. Sol usynystyń ishinen ózim tańdap, týǵan jerim Jambyl oblysyna jumysqa kettim. 2 jyl 3 aidai Jambyl oblysynda basqarma basshysy bolyp jumys istedim. Odan vitse-ministrlik qyzmet usyndy. Sol ýaqyttarda jer qaitarý boiynsha tapsyrma boldy.
Men jer inspektsiiasynda istedim. Sol jerde birshama jer qaitaryp, eski Qazaqstan deiikshi, qazir sánge ainaldy ǵoi, sol kezdegi múiizi qaraǵaidai azamattardyń eshqaisyna qaramai jerdi keri qaitardym. Eńbekti elegeni shyǵar, vitse-ministrlik qyzmet usyndy. Aldymyzǵa 10 million gektarlyq jer qaitarý tapsyrmasyn qoidy", - dedi olAbay Live-qa bergen suhbatynda.
Sondai-aq, Tamabek ministrliktegi shendi qyzmetten ketýine ne túrtki bolǵanyn ashyq aitty.
"Sol 10 million gektar jerdi qaitaryp, odan keiin kelesi kezeń Jambyl oblysy ákimi orynbasaryn usyndy. Erbol Shyraqbaiuly birge qyzmet istegenbiz. Vitse-ministrlikten eshkim meni qýǵan joq. Biraq týǵan jerime Astanadan jiǵan-tergen bilimimdi, tájiribemdi salaiyn dep baryp jatyrmyn.
Bul áńgime eshqandai shyndyqqa janaspaidy. Meni eshkim ministrlikten qýǵan joq.
Qazirgi aýyl sharýashylyq ministri Aidarbek Seipilulyna ózi "men ketemin" degennen keiin birneshe ret "jumysyńdy atqara ber" dep aitty. Ujymnyń aldynda da "bul azamatqa jumysta qalý týraly usynys berdim, óziniń tańdaýy" dedi. Sol sebepti ózimniń tańdaýym.
Ártúrli áńgime aitady: depýtattar ketirdi deidi, Smaiylovtyń komandasy ketkennen keiin bir kúnde alyp tastady deidi. Memlekettik qyzmette tájiribesi bar azamattar saiasi memlekettik qyzmetshiler Prezident ákimshiliginiń, Úkimettiń kelisimimen aldyn ala kelisiletinin biledi. Sol sebepti meniń qujatym da 28 jeltoqsan kúni Prezident ákimshiligine engen. Ol kezde Úkimet aýysýy týraly habar joq. Sol sebepti eshqandai depýtattar da ketirgen joq, Álihan Ashanulynyń komandasy bolyp ketti deitindei de eshqandai qisyn joq. Óz tańdaýymmen, sheshimimmen ketken azamatpyn. Árine, Prezident ákimshiliginiń kelisimi bar", - dedi Tamabek.
El arasynda Tamabek buryn aýyl sharýashylyǵy ministri bolǵan Shókeevtiń artynan ketti degen de áńgime tarady. Jas sheneýniktiń buǵan da jaýaby daiyn.
"Komandalyq aýysýlar bolatyn shyǵar, bolyp ta jatyr. Ózime qatysty nárseni aitaiyn.
Qazirgi Jambyl oblysynyń ákimi, kezindegi aýyl sharýashylyǵy ministri Erbol Shyraqpaiulymen aýyl sharýashylyǵy ministri bolǵanǵa deiin tanys bolǵan emespin. Ol kisi Jambyl óńirine ketti, men bes aidan keiin aýystym. Ol kisi ózi de birneshe ret kelý týraly usynys berdi. Birinshiden, ol kisi meniń jumysymdy kórdi, ekinshi másele, men Jambyl óńiriniń týmasy bolǵannan keiin shaqyrdy dep sanaimyn", - dep jaýap berdi ol.
Aita keteiik, buǵan deiin Úkimettiń baspasóz qyzmeti Ábilqaiyr Tamabek basqa jumysqa aýysýyna bailanysty aýyl sharýashylyǵy vitse-ministri qyzmetinen bosatylǵanyn habarlady. Ol bul qyzmetine 2 jyl buryn kelgen edi.
Vitse-ministrdiń esimi byltyr qyrkúiekte buqaralyq aqparat quraldary betinde tarady. Óitkeni sheneýnik Májilistiń Agrarlyq máseleler jónindegi komitetiniń keńeitilgen otyrysynda Respublica partiiasynyń jetekshisi Aidarbek Qojanazarovpen janjaldasyp qaldy.
Májilistegi otyrysta daý depýtattyń fermerler qiyn jaǵdaida ekenin aitqan málimdemesinen keiin týyndaǵan. Depýtat fermerlerdiń kóktemde egin egetin eshteńesi joq ekenin málimdegen. Buǵan jaýap retinde vitse-ministr "Azyq-túlik korporatsiiasynyń" tuqym retinde paidalanýǵa bolatyn bir tonnalyq astyq qory bar ekenine sendirgen.
Al áleýmettik jelidegi aqparatqa súiensek, jumystan bosap qalǵan Ábilqaiyr Tamabek burynǵy bastyǵyn izdep, Jambyl oblysyna ákimniń orynbasary bolyp barady. Iaǵni qaitadan burynǵy aýyl sharýashylyǵy ministri Qarashókeevtiń qol astyna ketedi degen aqparat boldy.
Bul boljam rastalyp, aýyl sharýashylyǵy vitse-ministri bolǵan Ábilqaiyr Tamabek Jambyl oblysy ákimdiginde jańa qyzmetke kiristi.
Ol Jambyl oblysy ákiminiń orynbasary bolyp taǵaiyndaldy.
