Qazaqstanda jekemenshik kreditorǵa qatysty qylmystyq is tergelip jatyr. Ol alty jyl ishinde ondaǵan azamatqa jarty milliard teńgeden astam somada zańsyz qaryz bergen. Bul týraly Qarjylyq monitoring agenttigi málimdedi, dep habarlaidy Dalanews.kz.
Agenttiktiń málimetinshe, kúdiktide resmi litsenziia bolmaǵanymen, ol áleýmettik jeliler men tanymal habarlandyrý servisi arqyly belsendi túrde qaryz berip otyrǵan. Qylmystyq isti Qostanai oblysy boiynsha agenttiktiń departamenti júrgizip jatyr.
"Zańsyz áreketterdi jasyrý úshin olardy zańdy mámile túrinde rásimdegen. Qujattarda naqty berilgen somadan áldeqaida kóp mólsher kórsetilgen, sebebi onyń ishine aldyn ala eseptelgen 100 paiyzǵa deiingi syiaqy qosylǵan. Qaryzdy qaitarý kepili retinde qaryz alýshylardyń múlki kepilge alynǵan. Osy tásilmen kúdikti jalpy somasy 556 mln teńgeden asatyn 72 mámile jasaǵan", – dep habarlady agenttik.
Zardap shekkenderdiń biri – Rýdnyi qalasynyń turǵyny, emdelýge aqsha qajet bolǵan egde jastaǵy áiel. Aqshany qaitarý úshin keiýana óziniń páterin kepilge qoiýǵa májbúr bolǵan.
"Zeinetker 13,2 mln teńge aldy degen kelisimmen ai saiyn 600 myń teńgeden eki jyl boiy tóleýi tiis bolǵan. Alaida shyn máninde qolyna nebári 6 mln teńge ǵana tigen. Al qalǵan 7,2 milliony – aldyn ala eseptelgen syiaqy. Mundai aýyr sharttar azamattar úshin múlde qoljetimsiz jáne olar óz múlkinen aiyrylý qaýpine dýshar bolady", – dedi Qarjylyq monitoring agenttigi.
Sottyń sanktsiiasymen kúdiktiniń alty záýlim úii men úsh kóligi tárkilendi. Arest qoiylǵan múliktiń jalpy quny 150 mln teńgeden asty.
