قازاقستاندا جەكەمەنشىك كرەديتورعا قاتىستى قىلمىستىق ءىس تەرگەلىپ جاتىر. ول التى جىل ىشىندە ونداعان ازاماتقا جارتى ميلليارد تەڭگەدەن استام سومادا زاڭسىز قارىز بەرگەن. بۇل تۋرالى قارجىلىق مونيتورينگ اگەنتتىگى مالىمدەدى، دەپ حابارلايدى Dalanews.kz.

اگەنتتىكتىڭ مالىمەتىنشە، كۇدىكتىدە رەسمي ليسەنزيا بولماعانىمەن، ول الەۋمەتتىك جەلىلەر مەن تانىمال حابارلاندىرۋ سەرۆيسى ارقىلى بەلسەندى تۇردە قارىز بەرىپ وتىرعان. قىلمىستىق ءىستى قوستاناي وبلىسى بويىنشا اگەنتتىكتىڭ دەپارتامەنتى جۇرگىزىپ جاتىر.

"زاڭسىز ارەكەتتەردى جاسىرۋ ءۇشىن ولاردى زاڭدى مامىلە تۇرىندە راسىمدەگەن. قۇجاتتاردا ناقتى بەرىلگەن سومادان الدەقايدا كوپ مولشەر كورسەتىلگەن، سەبەبى ونىڭ ىشىنە الدىن الا ەسەپتەلگەن 100 پايىزعا دەيىنگى سىياقى قوسىلعان. قارىزدى قايتارۋ كەپىلى رەتىندە قارىز الۋشىلاردىڭ مۇلكى كەپىلگە الىنعان. وسى تاسىلمەن كۇدىكتى جالپى سوماسى 556 ملن تەڭگەدەن اساتىن 72 مامىلە جاساعان"، – دەپ حابارلادى اگەنتتىك.

زارداپ شەككەندەردىڭ ءبىرى – رۋدنىي قالاسىنىڭ تۇرعىنى، ەمدەلۋگە اقشا قاجەت بولعان ەگدە جاستاعى ايەل. اقشانى قايتارۋ ءۇشىن كەيۋانا ءوزىنىڭ پاتەرىن كەپىلگە قويۋعا ءماجبۇر بولعان.

"زەينەتكەر 13،2 ملن تەڭگە الدى دەگەن كەلىسىممەن اي سايىن 600 مىڭ تەڭگەدەن ەكى جىل بويى تولەۋى ءتيىس بولعان. الايدا شىن مانىندە قولىنا نەبارى 6 ملن تەڭگە عانا تيگەن. ال قالعان 7،2 ميلليونى – الدىن الا ەسەپتەلگەن سىياقى. مۇنداي اۋىر شارتتار ازاماتتار ءۇشىن مۇلدە قولجەتىمسىز جانە ولار ءوز مۇلكىنەن ايىرىلۋ قاۋپىنە دۋشار بولادى"، – دەدى قارجىلىق مونيتورينگ اگەنتتىگى.

سوتتىڭ سانكسياسىمەن كۇدىكتىنىڭ التى ءزاۋلىم ءۇيى مەن ءۇش كولىگى تاركىلەندى. ارەست قويىلعان مۇلىكتىڭ جالپى قۇنى 150 ملن تەڭگەدەن استى.