Áleýmettik jelilerde jappai is-shara túsirilgen beinejazba tarap, oǵan qoǵamdyq jaǵdaidy turaqsyzdandyrýǵa baǵyttalǵan arandatýshylyq málimdemeler qosa berilgen. Atalǵan jaǵdaiǵa Mańǵystaý oblysynyń politsiia departamenti pikir bildirdi, dep habarlaidy Dalanews.kz.
Quqyq qorǵaý organdarynyń málimetinshe, bul beinerolik shamamen tórt jyl buryn túsirilgen jáne óńirdegi qazirgi ahýalǵa eshqandai qatysy joq.
«Mundai kontentti taratý azamattardy adastyrady, shynaiy jaǵdaidy burmalaidy jáne jalǵan aqparat taratý bolyp esepteledi», - dep atap ótti politsiia ókilderi Lada.kz-ke.
Sondai-aq taratylǵan materialdyń avtorynyń jeke basy anyqtalǵan. Politsiianyń málimetinshe, ol buryn sottalǵan jáne qazir izdeýde júr. 2024 jyly Atyraý qalasynyń soty ony birqatar aýyr qylmys jasaǵany úshin kináli dep tanyǵan. Qazirgi tańda kúdikti Qazaqstan Respýblikasynan tys jerde boi tasalap júr.
Ony ustaýǵa baǵyttalǵan jedel-izdestirý sharalary kesheni júrgizilip jatyr.
Mańǵystaý oblysynyń politsiia departamenti buqaralyq aqparat quraldarynda, áleýmettik jeliler men messendjerlerde kórineý jalǵan aqparat taratqany, sondai-aq arandatýshylyq sipattaǵy úndeýler jasaǵany úshin Qazaqstan Respýblikasynyń zańnamasyna sáikes qylmystyq jaýapkershilik qarastyrylǵanyn eske saldy.
Óńir turǵyndaryn tek resmi aqparat kózderine ǵana senýge jáne arandatýshylyqqa ermeýge shaqyrdy.
