الەۋمەتتىك جەلىلەردە جاپپاي ءىس-شارا تۇسىرىلگەن بەينەجازبا تاراپ، وعان قوعامدىق جاعدايدى تۇراقسىزداندىرۋعا باعىتتالعان ارانداتۋشىلىق مالىمدەمەلەر قوسا بەرىلگەن. اتالعان جاعدايعا ماڭعىستاۋ وبلىسىنىڭ پوليسيا دەپارتامەنتى پىكىر ءبىلدىردى، دەپ حابارلايدى Dalanews.kz.
قۇقىق قورعاۋ ورگاندارىنىڭ مالىمەتىنشە، بۇل بەينەروليك شامامەن ءتورت جىل بۇرىن تۇسىرىلگەن جانە وڭىردەگى قازىرگى احۋالعا ەشقانداي قاتىسى جوق.
«مۇنداي كونتەنتتى تاراتۋ ازاماتتاردى اداستىرادى، شىنايى جاعدايدى بۇرمالايدى جانە جالعان اقپارات تاراتۋ بولىپ ەسەپتەلەدى»، - دەپ اتاپ ءوتتى پوليسيا وكىلدەرى Lada.kz-كە.
سونداي-اق تاراتىلعان ماتەريالدىڭ اۆتورىنىڭ جەكە باسى انىقتالعان. پوليسيانىڭ مالىمەتىنشە، ول بۇرىن سوتتالعان جانە ءقازىر ىزدەۋدە ءجۇر. 2024 جىلى اتىراۋ قالاسىنىڭ سوتى ونى ءبىرقاتار اۋىر قىلمىس جاساعانى ءۇشىن كىنالى دەپ تانىعان. قازىرگى تاڭدا كۇدىكتى قازاقستان رەسپۋبليكاسىنان تىس جەردە بوي تاسالاپ ءجۇر.
ونى ۇستاۋعا باعىتتالعان جەدەل-ىزدەستىرۋ شارالارى كەشەنى جۇرگىزىلىپ جاتىر.
ماڭعىستاۋ وبلىسىنىڭ پوليسيا دەپارتامەنتى بۇقارالىق اقپارات قۇرالدارىندا، الەۋمەتتىك جەلىلەر مەن مەسسەندجەرلەردە كورىنەۋ جالعان اقپارات تاراتقانى، سونداي-اق ارانداتۋشىلىق سيپاتتاعى ۇندەۋلەر جاساعانى ءۇشىن قازاقستان رەسپۋبليكاسىنىڭ زاڭناماسىنا سايكەس قىلمىستىق جاۋاپكەرشىلىك قاراستىرىلعانىن ەسكە سالدى.
ءوڭىر تۇرعىندارىن تەك رەسمي اقپارات كوزدەرىنە عانا سەنۋگە جانە ارانداتۋشىلىققا ەرمەۋگە شاقىردى.
