Qostanai oblysynyń jas tennisshisi Janiia Bekmuhambetova álemdik sport shyńyna nyq qadam basyp keledi. Jasy bar bolǵany 12-de bolsa da, ol ótken jyldyń ózinde halyqaralyq jarystarda segiz ret jeńiske jetken. Endi Janiia jańa jetistigine Grýziianyń Batými qalasynda ótken Youth Contender Batumi 2025 halyqaralyq jasóspirimder ústel tennisi týrnirinde qol jetkizdi, dep habarlaidy Dalanews.kz.
18 qyrkúiekten 21 qyrkúiekke deiin ótken dodaǵa Ázerbaijan, Angliia, Frantsiia, Belarýs, Izrail, Qazaqstan, Litva, Moldova, Polsha, Soltústik Makedoniia, BAÁ, Bolgariia, Niderland, Úndistan, Túrkiia jáne Ýkraina sportshylary qatysty.
Bul jarysta Janiia birden eki jas sanatynda - U13 jáne U15 - synǵa tústi.
Qostanai oblysynyń aǵa jattyqtyrýshysy Ǵaiyp Daniiarovtyń aitýynsha, Janiia týrnirde erekshe oiyn kórsetti.
– Týrnir barysynda Janiia óz deńgeiin kórsetti. Finalda Úndistan sportshysy Kavia Gýptamen kezdesti. Biz onymen jii jolyǵamyz, ol - Aziia chempiony. Túrkiiadan kelgen qarsylasy da óte myqty boldy. Bul qyzdardy italiialyq mamandar daiyndaidy jáne olardy álem chempionattaryna ázirleidi, – dedi bapker.
Shirek finalda Janiia Ázerbaijannan Sofiia Trofimenkony jeńdi. Jartylai finalda Túrkiia sportshysy Belinai Davýsty 3:1 esebimen utty. Finalda Úndistannyń Kavia Gýptasyna qarsy shyǵyp, taǵy da 3:1 esebimen jeńiske jetip, altyn medal iegeri atandy.
Aita keteiik, Janiia ústel tennisimen ainalysa bastaǵanyna nebári 5 jyl bolǵan. Al 11 jasynda ol Horvatiiada ótken WTT Youth Contender týrnirinde óz jas sanatynda sensatsiialyq jeńiske jetken edi.
– Ótken jyly ol U11 sanatynda álemdik reitingte barlyq sportshylar arasynda ekinshi oryn ielendi. Endi maqsat – jasóspirimder olimpiadasyna qatysý, odan keiin eresekter quramasyna ený. Bul baǵytta taǵy 1–2 jyl jumys isteý qajet, – dedi Ǵaiyp Daniiarov.
№2 BJSM-niń jeke jattyqtyrýshysy Iýliia Daniiarova jas sportshynyń kún saiyn 3 saǵat jattyǵatynyn, soǵan qaramastan mektepte jaqsy oqitynyn aitty.
Qazirgi tańda Janiia Bekmuhambetova álemdik reitingte U13 sanatynda 12-oryndy senimdi túrde ustap tur.
Aita ketý kerek, Allur kompaniiasy ústel tennisi jarystarynyń turaqty seriktesi bolyp tabylady jáne Qostanai oblysynda bul sport túriniń damýyna belsendi úles qosyp keledi. Sonymen qatar, kompaniia qazaqstandyq tennisshilerge halyqaralyq jarystarǵa qatysýǵa múmkindik berip, daiyndyq úshin qajetti qoldaý kórsetýde.
