قوستاناي وبلىسىنىڭ جاس تەننيسشىسى جانيا بەكمۇحامبەتوۆا الەمدىك سپورت شىڭىنا نىق قادام باسىپ كەلەدى. جاسى بار بولعانى 12-دە بولسا دا، ول وتكەن جىلدىڭ وزىندە حالىقارالىق جارىستاردا سەگىز رەت جەڭىسكە جەتكەن. ەندى جانيا جاڭا جەتىستىگىنە گرۋزيانىڭ باتۋمي قالاسىندا وتكەن Youth Contender Batumi 2025 حالىقارالىق جاسوسپىرىمدەر ۇستەل تەننيسى تۋرنيرىندە قول جەتكىزدى، دەپ حابارلايدى Dalanews.kz.
18 قىركۇيەكتەن 21 قىركۇيەككە دەيىن وتكەن دوداعا ازەربايجان، انگليا، فرانسيا، بەلارۋس، يزرايل، قازاقستان، ليتۆا، مولدوۆا، پولشا، سولتۇستىك ماكەدونيا، ءباا، بولگاريا، نيدەرلاند، ءۇندىستان، تۇركيا جانە ۋكراينا سپورتشىلارى قاتىستى.
بۇل جارىستا جانيا بىردەن ەكى جاس ساناتىندا - U13 جانە U15 - سىنعا ءتۇستى.
قوستاناي وبلىسىنىڭ اعا جاتتىقتىرۋشىسى عايىپ دانياروۆتىڭ ايتۋىنشا، جانيا تۋرنيردە ەرەكشە ويىن كورسەتتى.
– تۋرنير بارىسىندا جانيا ءوز دەڭگەيىن كورسەتتى. فينالدا ءۇندىستان سپورتشىسى كاۆيا گۋپتامەن كەزدەستى. ءبىز ونىمەن ءجيى جولىعامىز، ول - ازيا چەمپيونى. تۇركيادان كەلگەن قارسىلاسى دا وتە مىقتى بولدى. بۇل قىزداردى يتاليالىق ماماندار دايىندايدى جانە ولاردى الەم چەمپيوناتتارىنا ازىرلەيدى، – دەدى باپكەر.
شيرەك فينالدا جانيا ازەربايجاننان سوفيا تروفيمەنكونى جەڭدى. جارتىلاي فينالدا تۇركيا سپورتشىسى بەليناي داۆۋستى 3:1 ەسەبىمەن ۇتتى. فينالدا ءۇندىستاننىڭ كاۆيا گۋپتاسىنا قارسى شىعىپ، تاعى دا 3:1 ەسەبىمەن جەڭىسكە جەتىپ، التىن مەدال يەگەرى اتاندى.
ايتا كەتەيىك، جانيا ۇستەل تەننيسىمەن اينالىسا باستاعانىنا نەبارى 5 جىل بولعان. ال 11 جاسىندا ول حورۆاتيادا وتكەن WTT Youth Contender تۋرنيرىندە ءوز جاس ساناتىندا سەنساسيالىق جەڭىسكە جەتكەن ەدى.
– وتكەن جىلى ول U11 ساناتىندا الەمدىك رەيتينگتە بارلىق سپورتشىلار اراسىندا ەكىنشى ورىن يەلەندى. ەندى ماقسات – جاسوسپىرىمدەر وليمپياداسىنا قاتىسۋ، ودان كەيىن ەرەسەكتەر قۇراماسىنا ەنۋ. بۇل باعىتتا تاعى 1–2 جىل جۇمىس ىستەۋ قاجەت، – دەدى عايىپ دانياروۆ.
№2 ءبجسم-نىڭ جەكە جاتتىقتىرۋشىسى يۋليا دانياروۆا جاس سپورتشىنىڭ كۇن سايىن 3 ساعات جاتتىعاتىنىن، سوعان قاراماستان مەكتەپتە جاقسى وقيتىنىن ايتتى.
قازىرگى تاڭدا جانيا بەكمۇحامبەتوۆا الەمدىك رەيتينگتە U13 ساناتىندا 12-ورىندى سەنىمدى تۇردە ۇستاپ تۇر.
ايتا كەتۋ كەرەك، Allur كومپانياسى ۇستەل تەننيسى جارىستارىنىڭ تۇراقتى سەرىكتەسى بولىپ تابىلادى جانە قوستاناي وبلىسىندا بۇل سپورت ءتۇرىنىڭ دامۋىنا بەلسەندى ۇلەس قوسىپ كەلەدى. سونىمەن قاتار، كومپانيا قازاقستاندىق تەننيسشىلەرگە حالىقارالىق جارىستارعا قاتىسۋعا مۇمكىندىك بەرىپ، دايىندىق ءۇشىن قاجەتتى قولداۋ كورسەتۋدە.
