Áleýmettik jelide Sanjar Kerimbaidyń "Ózbekáli jáne mádeni maidan" atty kitabynan úzindi tarady. Kitapta Nazarbaevtyń da esimi atalady, - dep habarlaidy Dalanews.kz.
Úzindide estelik Ózbekáli Jánibekovtiń balasynyń atynan berilgen. Dálirek aitsaq,onda úilený toiynyń barysy sipattalyp, alǵashynda toidy adýyndy aqyn Shahanov bastaǵany aitylady.
"Almatyda qazaqy naqyshta toi toilaý atymen quryǵan edi. Ákem arnaiy dombyrashy aldyryp, kelinine betashar jasap, barlyq igi jaqsyǵa iildirip sálem saldyrdy. Úilený toiym restoranda dúrkirep ótken joq. Bárin qosqanda 90 sharshy metr bolatyn tórt bólmeli páterde uiymdastyrdyq. Aǵaiyn-týys toiǵa dep aýyldan bir qap kúrish, bútin bir qoidyń etin arqalap kelgeni esimde. Toi aldynda ákem tula-boiymyzdy ólshep aldy da, tiginshige baryp, uly men kelinine qazaqsha oiý-órnegin jarqyratyp, ulttyq kiim tiktirip ákeldi. Toida kelinshegim sáýkele kiip otyrdy. Áli esimde, toidyń birinshi bóliminde Muhtar Shahanov tamada boldy. Biraq ol baiaý sóileitin bolǵasyn toidy qyzdyryp ákete almady. Jaqsy aqyn bolǵanymen,myqty asaba emes eken", - dep jazylǵan estelikte.
Kitapta toidyń ekinshi bóliminde tamada retinde jiyndy Nazarbaev tizgindegeni jazylǵan.
"Ol naǵyz asaba eken. Eldiń bárin kúldirip, otyrysty qainatyp jiberdi. Janýardyń júris-turysyn salyp,anekdot aityp, qonaqtardy kúlkige qaryq qyldy. Oiyn oinatyp eshkimniń ishin pystyrmady. Ásirese áielder jaǵy tamadaǵa riza bolǵany sonsha: "Shirkin, qandai jigit! Mine naǵyz azamat!" - dep onyń ónerine tamsana qol soǵyp, aýzynyń sýy quryp áńgimeledi. Nursultan barlyq qonaqqa erekshe áser qaldyrdy", - dep jazylǵan kitapta.
