«Búgingi dastarhan basynda «Soǵys ardagerleri», «Eńbek ardagerleri», «Batyr analar» syndy aıryqsha qurmetke ıe aldyńǵy býyn aǵa-apalar otyr. Sizder, búkil ǵumyrlaryńyzdy elimizdiń ósip, órkendeýine – bolashaq jastarymyzdyń jaqsy jaǵdaıda jetilýine baǵyshtadyńyzdar. Sondyqtan, osyndaı emdeý-saýyqtyrý ortalyǵyna kelip, em-dom alyp turýǵa ábden laıyqtysyzdar. Munda emdelýshi eki adamǵa bir qyzmetkerden bólingen. Odan bólek, ardagerlerimiz úshin túrli emdik prosedýralardy usynǵan kabınetter jetkilikti. Elbasynyń elimizdiń áleýmettik salalary – densaýlyq saqtaý men bilim berý salalaryna aıryqsha kóńil bólip otyrǵanyn bilesizder. Demek, memleketimizdiń osyndaı qamqorlyǵy odan ármen de jalǵasyn taba beretinine senimim kámil», - dedi oblys basshysy.
OQO jumyspen qamtýdy úılestirý jáne áleýmettik baǵdarlamalar basqarmasyna baǵynysty «Ardagerler úıi» komýnaldyq memlekettik mekemesinde búginde 175 ardager – tyl eńbekkerleri men zeınetkerler, batyr analar men múgedekter, sondaı-aq, aýǵan soǵysynyń ardagerleri emdik-saýyqtyrý sharalarynan ótýde.
Árbir on bes kúnde 200 ardagerdi qabyldaıtyn emdeý-saýyqtyrý ortalyǵynda jylyna 4 myń UOS ardagerleri men solarǵa teńestirilgender, «Halyq qaharmany» ataǵyn ıelengender, İİİ dárejeli Eńbek dańqy ordenimen marapattalǵandar, «Altyn alqa», «Kúmis alqamen» nagradtalǵandar jáne jasyna, múgedektigine baılanysty zeınetkerler emdeledi.
OQO ákiminiń baspasóz qyzmeti
