QR Ónerkásip jáne qurylys vitse-ministri Jánnat Dúbirova geologiia salasyn tsifrlandyrý nátijesin bólisti, dep habarlaidy Dalanews.kz.
"Jer qoinaýyn paidalaný jáne geologiia salasyndaǵy negizgi jobalardyń biri – Jer qoinaýyn paidalaný biryńǵai platformasynyń (JQP) qurylýy. Bul platforma 25 memlekettik qyzmetti tsifrlyq formatqa biriktirip, geologiialyq málimetter bazasyna kópshiliktiń qoljetimdiligin qamtamasyz etedi.
Osy joba aiasynda biz tek memlekettik qyzmetterdi usyný protsesterin qaita qarap, normativtik-quqyqtyq bazany jańartyp qana qoimai, sonymen qatar JQP-ny tolyqtyrý úshin bastapqy jáne qaitalama geologiialyq aqparattardy belsendi túrde tsifrlandyrý jumystaryn júrgizýdemiz”, - deidi Ónerkásip jáne qurylys vitse-ministri Jánnat Dúbirova.
Aitýynsha, geologiialyq aqparat tolyqqandy tsifrlyq formatqa kóshiriledi.
"Geologiialyq aqparat" degenimiz ne? Bul – ótken ǵasyrdyń 60-shy jyldarynan bastap jinaqtalǵan qaǵaz kartalar, esepter, magnittik taspalar jáne basqa da geologiialyq zertteý derekteriniń muraǵaty. Barlyq málimet, onyń ishinde geologiialyq, geofizikalyq jáne gidrogeologiialyq zertteýlerdiń nátijeleri Qazaqstan aýmaǵyna egjei-tegjeili bailanystyrylyp, tsifrlyq formatqa kóshiriledi”, - deidi ol.
Onyń sózinshe, qazirgi ýaqytta biryńǵai standart boiynsha qurylymdalǵan jáne geologiialyq-geofizikalyq zertteýlermen bailanystyrylǵan 56 180 elektrondyq esep daiyndaldy.
“Bul esepter onlain rejiminde aqysyz tanysýǵa qoljetimdi bolady, osylaisha geologiialyq qorlarǵa barý qajettiligin joiady. Qajet bolǵan jaǵdaida tolyq málimetter paketine qol jetkizý múmkindigi qarastyrylǵan.
Qyzyǵýshylyq tanytqan aýmaqtardy tereńirek zertteý úshin biz eldiń geologiialyq qorlaryndaǵy bastapqy geologiialyq aqparattardy tsifrlandyrýdamyz. Bul úderis 7 kezeńdi qamtidy: skanerleýden bastap, esepterdi jinaqtaý, sapany baqylaý jáne derekterdi JQP-ǵa engizý. Nátijesinde, paidalanýshylar kez kelgen aimaq boiynsha tolyq aqparatqa qol jetkizip, jer qoinaýyn paidalaný salasyndaǵy investitsiialyq strategiialaryn ońtailandyrýǵa múmkindik alady”, - dedi ol.
Jer qoinaýyn paidalaný biryńǵai platformasynyń engizilýi geologiialyq aqparattyń qoljetimdiligin arttyryp qana qoimai, qajetti málimetterdi alý úderisin edáýir jyldamdatady.
“Endi áleýetti jer qoinaýyn paidalanýshylar, investorlar jáne basqa da múddeli taraptar geologiialyq-geofizikalyq zerttelgen aimaqtar týraly ózekti málimetterge kez kelgen ýaqytta qol jetkize alady, bul sheshim qabyldaý úderisin aitarlyqtai jeńildetedi.
Geologiialyq derekterdi tsifrlandyrý jer qoinaýyn paidalaný sektorynyń odan ári damýy jáne el ekonomikasyna jańa investitsiialardy tartý úshin úlken mańyzǵa ie. Mundai derekterge qol jetkizýdiń jyldamdatylýy men ońailatylýy salanyń ashyqtyǵyn arttyryp, bizneste jańa múmkindikter jasaýǵa yqpal etedi”, - dep qosty ol.
Vitse-ministrdiń aitýynsha, bolashaqta Jer qoinaýyn paidalaný biryńǵai platformasy eldiń resýrstaryn tiimdi basqarý úshin qajetti barlyq derekti biriktiretin negizgi quralǵa ainalady.
“Biz geologiianyń tarihi murasyn saqtap qana qoimai, qoǵam men biznestiń múddelerine uzaq jyldar boiy qyzmet etetin zamanaýi jáne tiimdi basqarý júiesin qurýǵa umtylamyz”, - dedi ol.
