ҚР Өнеркәсіп және құрылыс вице-министрі Жәннат Дүбірова геология саласын цифрландыру нәтижесін бөлісті, деп хабарлайды Dalanews.kz.
"Жер қойнауын пайдалану және геология саласындағы негізгі жобалардың бірі – Жер қойнауын пайдалану бірыңғай платформасының (ЖҚП) құрылуы. Бұл платформа 25 мемлекеттік қызметті цифрлық форматқа біріктіріп, геологиялық мәліметтер базасына көпшіліктің қолжетімділігін қамтамасыз етеді.
Осы жоба аясында біз тек мемлекеттік қызметтерді ұсыну процестерін қайта қарап, нормативтік-құқықтық базаны жаңартып қана қоймай, сонымен қатар ЖҚП-ны толықтыру үшін бастапқы және қайталама геологиялық ақпараттарды белсенді түрде цифрландыру жұмыстарын жүргізудеміз”, - дейді Өнеркәсіп және құрылыс вице-министрі Жәннат Дүбірова.
Айтуынша, геологиялық ақпарат толыққанды цифрлық форматқа көшіріледі.
"Геологиялық ақпарат" дегеніміз не? Бұл – өткен ғасырдың 60-шы жылдарынан бастап жинақталған қағаз карталар, есептер, магниттік таспалар және басқа да геологиялық зерттеу деректерінің мұрағаты. Барлық мәлімет, оның ішінде геологиялық, геофизикалық және гидрогеологиялық зерттеулердің нәтижелері Қазақстан аумағына егжей-тегжейлі байланыстырылып, цифрлық форматқа көшіріледі”, - дейді ол.
Оның сөзінше, қазіргі уақытта бірыңғай стандарт бойынша құрылымдалған және геологиялық-геофизикалық зерттеулермен байланыстырылған 56 180 электрондық есеп дайындалды.
“Бұл есептер онлайн режимінде ақысыз танысуға қолжетімді болады, осылайша геологиялық қорларға бару қажеттілігін жояды. Қажет болған жағдайда толық мәліметтер пакетіне қол жеткізу мүмкіндігі қарастырылған.
Қызығушылық танытқан аумақтарды тереңірек зерттеу үшін біз елдің геологиялық қорларындағы бастапқы геологиялық ақпараттарды цифрландырудамыз. Бұл үдеріс 7 кезеңді қамтиды: сканерлеуден бастап, есептерді жинақтау, сапаны бақылау және деректерді ЖҚП-ға енгізу. Нәтижесінде, пайдаланушылар кез келген аймақ бойынша толық ақпаратқа қол жеткізіп, жер қойнауын пайдалану саласындағы инвестициялық стратегияларын оңтайландыруға мүмкіндік алады”, - деді ол.
Жер қойнауын пайдалану бірыңғай платформасының енгізілуі геологиялық ақпараттың қолжетімділігін арттырып қана қоймай, қажетті мәліметтерді алу үдерісін едәуір жылдамдатады.
“Енді әлеуетті жер қойнауын пайдаланушылар, инвесторлар және басқа да мүдделі тараптар геологиялық-геофизикалық зерттелген аймақтар туралы өзекті мәліметтерге кез келген уақытта қол жеткізе алады, бұл шешім қабылдау үдерісін айтарлықтай жеңілдетеді.
Геологиялық деректерді цифрландыру жер қойнауын пайдалану секторының одан әрі дамуы және ел экономикасына жаңа инвестицияларды тарту үшін үлкен маңызға ие. Мұндай деректерге қол жеткізудің жылдамдатылуы мен оңайлатылуы саланың ашықтығын арттырып, бизнесте жаңа мүмкіндіктер жасауға ықпал етеді”, - деп қосты ол.
Вице-министрдің айтуынша, болашақта Жер қойнауын пайдалану бірыңғай платформасы елдің ресурстарын тиімді басқару үшін қажетті барлық деректі біріктіретін негізгі құралға айналады.
“Біз геологияның тарихи мұрасын сақтап қана қоймай, қоғам мен бизнестің мүдделеріне ұзақ жылдар бойы қызмет ететін заманауи және тиімді басқару жүйесін құруға ұмтыламыз”, - деді ол.
