Jańaózende órt sóndirý kóligi men Lifan markaly jeńil kólik soqtyǵysyp, saldarynan eki adam qaza tapty. Taǵy birneshe adam túrli jaraqatpen aýrýhanaǵa jetkizildi, dep habarlaidy Dalanews.kz.
Jol apaty 18 qańtarǵa qaraǵan túni Manat kóshesinde bolǵan. Aldyn ala málimet boiynsha shaqyrtýǵa bara jatqan órt sóndirý kóligi Lifan kóligimen soqtyǵysqan. Soqqy saldarynan arnaiy tehnika qorshaýǵa jáne jekemenshik turǵyn úige soǵylǵan.
Mańǵystaý oblystyq Politsiia departamentiniń málimetinshe, oqiǵa saldarynan eki adam kóz jumdy.
Bes adam zardap shekken, olardyń úsheýi - órtke qarsy qyzmettiń qyzmetkerleri. Barlyǵy meditsinalyq mekemelerge jetkizilgen.
