Qaraǵandy oblysynan Ulytaý oblysynyń, Shyǵys Qazaqstan oblysynan Abai oblysynyń jáne Almaty oblysynan Jetisý oblysynyń bólinip shyǵýy áleýmettik-ekonomikalyq turǵydan qabyldaǵan sheshim desek bolady.
Táýelsizdik jyldary elordamyz Astanany salýǵa airyqsha kóńil bólinip, oblystarǵa tiisti deńgeide kóńil bólinbegine jasyryn emes.
Memleket basshysy osy bir ózekti máselege airyqsha kóńil bólip, elimiz úshin mańyzdy sheshim qabyldaǵany durys boldy. Jańa oblystardy qurý aitar aýyzǵa jeńil dúnie bolǵanymen jańa oblystardyń aýmaqtyq territoriiasyn anyqtap, ákimshilik basqarý júiesin qurý úshin biraz ýaqyt qajet.
Jańa oblystardy qurý kezinde jergilikti halyqtyń pikiri de eskerilgenin aita ketýimiz kerek. Táýelsizdik jyldary Shyǵys Qazaqstan oblysynyń quramyndaǵy bolǵan Semei qalasy qatty júdep-jadaǵany jasyryn emes. Endi Semei qalasy jeke-dara Abai oblysynyń ortalyǵy retinde qaita qurylyp, damýdyń jańa kezeńine aiaq basaiyn dep tur.
Memlekettik basqarý júiesi barlyq aimaqtardyń teń dárejede damýyn qamtamasyz etýi mańyzdy. Sol kezde elimizdiń ekonomikalyq qýaty artyp, halyqtyń áleýmettik jaǵdaiy arta túsetini anyq. Mundai kezeńde memlekettiń basqarý júiesiniń oń baǵytta jumys istep jatqanyn baǵamdaýǵa bolady. Osy turǵydan alǵanda Memleket basshysynyń elimizde jańa oblystardy quryp, olardyń da jan-jaqty damýyna mán berý mańyzdy bastama ekeni sózsiz.
Qolǵa alynǵan aýmaqtyq damý baǵytyndaǵy jumystar aimaqtardyń áleýmettik-ekonomikalyq daýyndaǵy teńgerimsizdikti joiyp, halyqtyń áleýmettik jaǵdaiynyń jaqsarýyna septigin tigizetin bolady.
Bul baǵyttaǵy jumystar 5 millionnan astam adamnyń turmys jaǵdaiyna jaqsarýyna áser etetin bolady.
Osy rette kózi qaraqty oqyrmandary «elimizde jańa oblystardyń paida bolýy halyqtyń turmys jaǵdaiyna qalai áser etedi?» dep suraityny anyq. Buǵan jaýap berip ketýdiń mańyzy zor. Aitalyq, osyǵan deiin shalǵaida jatqan aýyl-aimaqtarda turatyn azamattar qandaida bir qaǵaz qujattyń retteý úshin oblys ortalyǵyna barý úshin uzaq jol júrýine týra kelgen edi. Aitalyq, Almaty oblysyna qarasty Jambyl aýdanynyń turǵyndary oblys ortalyǵy Taldyqorǵanǵa barýy úshin biraz qarjysy men ýaqytyn joǵalatyp keldi. Endi Jambyl men Talǵar aýdanynyń turǵyndary 300 shaqyrym qashyqtyqta jatqan Taldyqorǵanǵa shapqylamaidy. Bar sharýasyn 100 shaqyrym jerdegi Qonaev qalasyna baryp bitirip, túske deiin úiine kelip alady. Osylaisha ondaǵan myń adam aqshasy men ýaqytyn únemdeidi.
Qazaqtyń jeri úlken. Sol sebepti taýardyń ózindik qunynyń biraz bóligi jol shyǵynyna ketetini jasyryn emes. Elimizde sońǵy ret oryn alǵan aýmaqtyq-ákimshilik bólinis zaman suranysynan týyndaǵan dúnie. Sondyqtan Memleket basshysy Qasym-Jomart Toqaevtyń bul bastamasyn qarapaiym halyq qoldap otyr.
