QMA Astana qalasy boıynsha departamenti zańsyz kásipkerlik qyzmetpen aınalysý jáne qylmystyq jolmen alynǵan aqsha qarajatyn zańdastyrý faktileri boıynsha blogerler Erbolat Janabylov pen Elmıra Tolegenovaǵa qatysty sotqa deıingi tergep-tekserýdi aıaqtady, dep habarlaıdy Dalanews.kz.
Tergeý amaldaryna saı, Instagram áleýmettik jelisinde (15 mıllıonnan astam jazylýshysy bar) kóp mıllıondyq aýdıtorıaǵa ıe erli-zaıyptylar óz jazylýshylarynyń senimin zańsyz tabys tabý maqsatynda paıdalanǵan. 2025 jyly olar onlaın-kýrstardy satý degen jeleýmen zańsyz shema uıymdastyrǵan. Atalǵan «kýrstardy» satyp alýdyń negizgi sebebi – qymbat syılyqtar utysyna qatysý bolǵan.
Taratylǵan beınematerıaldar basym bóligi basym bóligi ashyq derekkózderden, sonyń ishinde YouTube platformasynan alynǵan. Bul kýrstardyń naqty bilim berý qundylyǵy bolmaǵan jáne olar zańsyz lotereıa qyzmetin formaldy túrde jasyrý úshin ǵana paıdalanylǵan.
Júlde qory jarıa túrde málimdelgendeı jeke qarajaty esebinen emes, onlaın-kýrstarǵa aqy tóleý túrinde qatysýshylardan túsken aqsha qarajaty esebinen qalyptastyrylǵan.
Elektrondy «sáttilik barabanynyń» parametrlerin ózgertý faktileri anyqtaldy, sonyń nátıjesinde 5 000 teńgelik júldeni utyp alý yqtımaldyǵy jasandy túrde arttyrylyp, al qundy júldelerdi utyp alý múmkindigi edáýir tómendetilgen.
Kúdiktiler jarıa túrde eń kóp repost jasaǵan qatysýshyǵa 11-nshi avtokólikti tabystalǵany týraly málimdep, aksıanyń qamtý aıasyn keńeıtý men nazar aýdarý maqsatyn kózdegen. Alaıda is júzinde jeńimpaz anyqtalmaǵan jáne syılyq tabystalmaǵan.
Nátıjesinde azamattardan «Zhana Business» JSHS-niń baqylaýyndaǵy shottarǵa túsken qarajattyń jalpy somasy 247,5 mln teńgeni quraǵan, onyń 60 mln teńgesi depozıttik shottarǵa ornalastyrylǵan.
Sot sanksıasymen 17 iPhone uıaly telefonyna jáne Lamborghini Urus pen Lexus LX 600 avtokólikterin qosa alǵanda, 10 avtokólikke tyıym salyndy.
Kúdiktilerge qatysty úıqamaq túrindegi bultartpaý sharasy tańdaldy.
Qazirgi ýaqytta kúdiktiler qylmystyq is materıaldarymen tanysýǵa kiristi.
Qazaqstan Respýblıkasy Qylmystyq-prosestik kodeksiniń 201-babyna sáıkes ózge aqparat jarıa etýge jatpaıdy.
