Májiliste jańa Salyq kodeksiniń jobasy talqylanyp jatyr. Premer-ministrdiń orynbasary – ulttyq ekonomika ministri Serik Jumanǵarin joba byltyr qyrkúiekten bastap qaralyp jatqanyn, biyl oǵan tujyrymdamalyq túzetýler engizilgenin málimdedi, – dep habarlaidy Dalanews.kz.
"Birinshi – qosylǵan qun salyǵy 16% bolady. Ekinshi – qosylǵan qun salyǵynyń shegi. Qosylǵan qun salyǵy boiynsha shek 40 mln. teńge mólsherinde belgilenedi.
Úshinshi – áleýmettik mańyzy bar azyq-túlik, kitap basyp shyǵarý, arheologiia – qosylǵan qun salyǵyn tóleýden bosatylady. Tórtinshi – áleýmettik salada, densaýlyq saqtaý salasynda Úkimet qosylǵan qun salyǵynan bosatylǵan dári-dármekterdiń áleýmettik tizimin aiqyndaityn bolady. Qosylǵan qun salyǵy tek aqyly meditsinalyq qyzmetterge salynady. Qosylǵan qun salyǵynyń mólsherlemesi 10% bolady",- dedi vitse-premer.
Jumanǵarinniń sózinshe, áleýmettik saladaǵy korporativtik tabys salyǵy 2026 jyldan bastap 5% jáne 2027 jyldan bastap 10% bolady.
"Besinshi – bank operatsiialaryna qosylǵan qun salyǵy salynady. Olardyń baǵasynyń ósýine jol bermeý úshin Básekelestikti qorǵaý agenttigi Úkimetpen birlesip, aǵymdaǵy baǵalardyń durystyǵyna taldaý júrgizedi. Altynshy – arnaýly salyq rejimi boiynsha ruqsat etilgen tizim emes, tyiym salynǵan tizim engiziledi. Tyiym salynbaǵannyń bárine ruqsat etiledi. Jetinshi – aýyl sharýashylyǵy taýaryn óndirýshiler boiynsha bárin sol kúiinde qaldyramyz. Iaǵni, 70% jeńildik qalady. Segizinshi – óńdeý ónerkásibine korporativtik tabys salyǵynyń 20% mólsherlemesi boiynsha salyq salynady", - dedi ol.
Ulttyq ekonomika ministri Salyq reformasynan ne kútiletinin aitty.
"Nátije aiqyn seziletin bolady: jylyna qosymsha 4-5 trln teńge salyq túsimderi, Ulttyq qorǵa táýeldiliktiń tómendeýi, biýdjet ózin-ózi qamtamasyz etedi.
Iá, ózgerister infliatsiiaǵa áser etýi múmkin, biraq bul áser ýaqytsha bolady jáne bir jyl ishinde kútilýde. Bizdiń esepteýlerimiz boiynsha qosymsha infliatsiia 2,5-3%-dy quraidy. Bul jobanyń negizgi usynystary. Bizdiń birlesken jumysymyz eldiń damýy úshin qarjylyq negizdi qamtamasyz etetin jáne halyqtyń kásipkerlik belsendiligin yntalandyratyn jańa ádil salyq júiesin qurýǵa múmkindik beretinine senimdimin", - dedi Jumanǵarin.
