Bul jobany birlesip qolǵa alǵan Qorǵanys jáne Ǵylym jáne joǵary bilim ministrliginiń maqsaty – áskerdiń bedeli men jastardyń el aldyndaǵy boryshyna adaldyǵyn arttyrý. Osylaisha, 2023 jyldan bastap áskerge baryp kelgen azamattar ulttyq biryńǵai testileýdiń nátijesinsiz-aq oqýǵa qabyldanýǵa múmkindigi bar. Tipti, aqyly negizde de bilim alýyna bolady.
Qorǵanys ministrliginiń keńesshisi Aigúl Tólembaevanyń aitýynsha, qazirdiń ózinde munyń erejesi qarastyrylyp jatyr.
«Joba kelesi jyldan bastap júzege asady. Alaida, bul jeńildik qazir áskerde boryshyn ótep jatqan sarbazdarǵa arnalady. Bul jobany Ǵylym jáne joǵary bilim ministrligi, joǵary oqý oryndarynyń rektorlary qoldap otyr», – dedi Aigúl Tólembaeva.
Aitpaqshy, áskeri boryshyn buǵan deiin ótep kelgen sarbazdar kúntizbelik kezeń boiynsha, kúzde zapasqa aýystyrylǵannan keiin, iaǵni, áskerge baryp kelgen eki jyldyń ishinde áreket etip, oqýǵa túse alady. Sondai-aq, áskerdegi boryshyn adal atqaryp, qyzmette jetistikke jetip, áskeri daiyndyq kezinde joǵary kórsetkish kórsetkender joǵary oqý ornynyń grantyna ie bolady.
Sondai-aq, keńesshi Qorǵanys ministri, general-polkovnik Rýslan Jaqsylyqovtyń joǵary oqý orny rektorlaryna arnaiy shyǵyp, sarbazdardyń joǵary bilim alýyna múmkindik týǵyzý jóninde usynys jasady.
Bul bastamany ministr habarlasqan oqý oryndarynyń bári biraýyzdan qoldaǵanyn jetkizdi.
Aita ketý kerek, bul usynysty respýblikadaǵy 40 shaqty oqý orny qup kórgen. Atap aitqanda, L.N. Gýmilev atyndaǵy Eýraziia ulttyq ýniversiteti, Satbayev University, Astana IT University kósh bastap tur. Búginde qorǵanys salasyna jaýap beretin ministrlik elimizdegi joǵary oqý oryndary jylyna 3 myńnan kem emes grant usynady dep boljap otyr.
Nátijesinje ásker qataryna alynǵan árbir onynshy sarbaz joǵary bilimdi tegin alady. Bul múmkindikke Qorǵanys kúshteriniń quramasy men bólimderindegi sarbazdar ǵana emes, Shekara qyzmeti, Ulttyq ulanda qyzmet atqaratyn jaýyngerler de ie bolady.
Bul turǵyda ministrlik olardyń daiyndyq jáne qyzmet barysyndaǵy betalysyn saraptap, jinaǵan upaiyn reiting boiynsha esepteýge kirisip, ádistemesin jasaqtap jatyr.
«Bul olardyń ásker kezindegi alǵan baǵasynyń jinaq júiesi. Al sarbaz qalǵan qosymsha balldy áskeri tártibine qarai jáne áskeri ujymnyń qoǵamdyq ómirine belsendi qatysqanyna orai alady», – dep túiindedi pikirin QR Qorǵanys ministriniń keńesshisi A.Tólembaeva.
