Threads jelisinde Jańa jylǵa qatysty jazba tarady. Avtordyń aitýynsha, Rýslan Berdenov basqaratyn kompaniiada jańa jyldyq kesh uiymdastyrýǵa jáne tátti syilyqtar taratýǵa tyiym salynǵan. Onyń sózinshe, resmi sebep retinde "Jańa jyl musylmandardyń merekesi emes" degen ýáj aitylǵan, dep habarlaidy Dalanews.kz.
Rýslan Berdenov osy jaitqa qatysty pikir bildirdi.
"Meniń Jańa jylǵa qatysty jáne kompaniia ishindegi ustanymyma bailanysty jalǵan aqparat tarap jatyr eken. Qazaqstan - zaiyrly memleket. Biz kópultty, kópkonfessiialy elmiz. Sondyqtan men úshin basshy retinde "durys" nemese "burys" din men mádeniet ókilderi degen uǵym joq jáne bolýy da múmkin emes. Men barlyq dástúrge qurmetpen qaraimyn. Ol Jańa jyl bolsyn, Naýryz bolsyn, Rojdestvo, Qurban ait nemese adam men onyń otbasy úshin mańyzdy kez kelgen mereke bolsyn, bári de qadirli", - dedi ol.
Rýslan Berdenov qaýipsizdik qyzmeti bul oqiǵany tekserip jatqanyn málimdedi.
"Dini sebeppen merekeni atap ótýden bas tartý, korporativterdi nemese jańa jyldyq syilyqtardy alyp tastaý týraly eshqandai sheshim qabyldanǵan joq jáne ondai sheshim qabyldanýy da múmkin emes. "Jańa jyl musylman merekesi emes, sondyqtan biz qyzmetkerlerdi quttyqtamaimyz" degen málimdemeler shyndyqqa janaspaidy. Osyndai habarlamalarǵa saqtyqpen qarap, tekserilmegen aqparatqa súienip, qorytyndy jasamaýdy suraimyn", - dedi ol.
