Áleýmettik jelilerde Jambyl oblysy boıynsha QR Bas prokýratýrasynyń Quqyq qorǵaý organdarynyń qyzmetin úılestirý departamentiniń qazirgi qyzmetkeri Álıa Qojabekovanyń málimdemesinen keıin departament basshysy jumystan ketti, dep habarlaıdy Dalanews.kz.
"Za namı vyehalı" telegram arnasynyń málimetinshe, Jambyl oblysy boıynsha Quqyqtyq statısıka jáne arnaıy esepke alý komıteti departamentiniń basshysy Seker Búrkitbaev daýly málimdemelerden keıin otstavkaǵa ketken. Bul aqparatty Bas prokýratýra rastaǵan.
"Departament basshysy S. Búrkitbaev 2024 jylǵy 2 maýsymda ózi jazǵan raport negizinde qyzmetinen bosatyldy", – delingen vedomstvo habarlamasynda.
Eske salaıyq, buǵan deıin áleýmettik jelilerde Jambyl oblysy boıynsha QR Bas prokýratýrasynyń Quqyq qorǵaý organdarynyń qyzmetin úılestirý departamentiniń qazirgi qyzmetkeri Álıa Qojabekovanyń taǵy bir beıneúndeýi taraǵan bolatyn. Onda Seker Búrkitbaevtyń da aty atalady.
Ol alǵashqy úndeýleri qyzý talqylanyp, jelige tarap ketkennen keıin prezıdent ákimshiligi, bas prokýratýra, quqyqtyq statısıka jáne arnaıy esepke alý komıteti ony jumystan qýýdy qolǵa alýy múmkin.
– Memlekettik organdar meni qaralap, jazǵandarymdy jalǵan etip kórsetýge tyrysady. Biraq shyndyqtan basqa jol joq. Men túsinemin, áleýmettik jelide mundaı nárseni aıtý – ózime jaý tabýmen teń. Biraq bul men úshin birinshi ret emes, – deıdi ol.
«2024 jyly barlyq jaýapty organdarǵa birneshe ret júgindim»
Qojabekova 2024 jyly Bas prokýror Berik Asylovqa, komıtet tóraǵasy Nurlybaı Sabıtke, sondaı-aq Prezıdent ákimshiligine birneshe ret resmı túrde hat jazyp, Jambyl oblysy boıynsha departamenttegi zańbuzýshylyqtar týraly málimdegenin aıtady. Sonymen qatar UQK men Sybaılas jemqorlyqqa qarsy agenttikke de resmı túrde júgingen.
– Biraq meniń barlyq ótinishterim tek sol baıaǵy Komıtetke, ıaǵnı zań buzýshylyqqa qatysy bar qurylymǵa qaıtarylyp otyr. Bul bir aınaldyrsa, shyr aınaldyrǵan problema boldy, – deıdi prokýror.
Birinshi fakt
2022 jyldyń qarashasynda Jambyl oblysy boıynsha departament qyzmetkeri para alý ústinde ustalyp, Taraz qalalyq soty arqyly sottalǵan. Biraq departament basshysy Seker Búrkitbaev eshqandaı jaýapkershilikke tartylmaǵan.
– Bul qyzmetker adamdardy «sottalǵandyǵyńdy óshirem» dep aldap, aqsha alǵan. Biraq basshylyqqa shara qoldanylmady, – deıdi Qojabekova.
Ekinshi fakt
2023 jyly Búrkitbaev zańsyz buıryq shyǵaryp, departamenttiń bir qyzmetkerin jumystan shyǵarǵan. Biraq 2024 jyldyń sáýirinde Taraz qalalyq soty bul buıryqty zańsyz dep tanyp, qyzmetkerdi qaıtadan jumysqa qabyldatqan. Alaıda basshylyqqa bul úshin de eshqandaı shara qoldanylmaǵan.
Úshinshi fakt
2024 jyly departamenttegi birqatar qyzmetkerler – orynbasar Kalabaev Baqytjan men aǵa prokýror Kenjebekov Begzat – qylmystyq isterdi tirkeý boıynsha bazasynda zańsyz ózgertýler engizgeni úshin tártiptik jaza alǵan. Biraq Búrkitbaev taǵy da jaýapsyz qaldy.
– Bul faktini men ózim anyqtadym. Al tekserý jumystary meniń birneshe ret hat jazýymnan keıin ǵana qozǵaldy, – deıdi ol.
«Tekserý júrgizilmeı jatyp, qorytyndysy aldyn ala belgili boldy»
Prokýror 2025 jylǵy 23 sáýir kúni saǵat 18:00-de eOtinish portaly arqyly Bas prokýratýradan resmı jaýap alǵanyn aıtady. Biraq jaýap Komıtet tóraǵasynyń orynbasary Qusaıynovtyń qolymen berilgen. Onyń aıtýynsha, bul – sol zańbuzýshylyqtar oryn alǵan organnyń ózinen kelgen jaýap.
– Biraq dál sol kúni tańerteń, 9:00 shamasynda, áleýmettik jelide «faktiler rastalmady» degen jazba jarıalandy. Sonda meniń ótinishim qaralmaı jatyp, nátıje aldyn ala belgili bolǵan ba? Bul – Búrkitbaev pen onyń komandasyn aqtap alýdyń kezekti amaly, – deıdi Qojabekova ashynyp.
Onyń pikirinshe, bul – Genprokýratýra tarapynan eshqandaı shynaıy tekserý júrgizilmegeniniń aıqyn dáleli.
«Búrkitbaev pen onyń qoldaýshylaryn tekserýdi talap etemin»
Qojabekova Bas prokýratýra men Antıkordan myna tulǵalarǵa qatysty naqty shara qoldanýdy suraıdy: Seker Búrkitbaev, Kalaspaev, Kalabaev, Kenjebekov, Kenbaev jáne Izmaǵambetova.
– Eger bul bazalardaǵy ózgerister qasaqana jáne tegin emes jasalǵan bolsa, bul – tártiptik jaza emes, qylmystyq jaýapkershilikpen qaralýy tıis jaǵdaı, – deıdi ol.
Qojabekova sondaı-aq 2013–2023 jyldar aralyǵyndaǵy sotqa deıingi tergep-tekserýdiń biryńǵaı tizilimi júıesindegi málimetterge jasalǵan ózgeristerdiń zańdylyǵyn tekserýdi suraıdy. Onyń aıtýynsha, bul zańsyz túzetýler júıeli túrde, josparly túrde jasalǵan jáne olardyń naqty ýaqyty, oryndalǵan qoldanýshy týraly málimetter saqtalyp, prokýratýra qyzmetkerlerine qoljetimdi.
