Osy oraida bizdiń redaktsiia ajalmen arpalysqan batyrlardy qazaqtildi aýditoriiaǵa tanys etip, olardyń birqatarynyń ómir jolyn toqtala ketkendi jón kórdi.
26-shy tamyzda Jambyl oblysynyń Baizaq aýdanynda oq-dári qoimasy jaryldy. Tragediia 14 adamnyń ómirin qidy, 100-ge tarta turǵyn jaraqat aldy. Al joǵalǵan órt sóndirýshilerdi izdeý jumysy áli jalǵasyp jatyr.
Apattyń aldyn-alý úshin oqiǵa ornyna jedel jetken órt sóndirýshiler men qutqarýshylardyń kópshiligi jan tapsyrdy.
Dalanews.kz tilshisi esimi el esinde qalýy tiis batyrlardy qazaqtildi oqyrmanǵa tanys etýdi paryz dep tapty:
Eldos Sandybaev, Jambyl oblysy, Taraz qalasy Tótenshe jaǵdai departamentiniń aǵa-órt sóndirýshi-qutqarýshysy.
Eldos oqiǵa oryn ornyna alǵashqy bolyp jetipti. Tótenshe jaǵdai qyzmetinde 2013 jyldan beri isteitin tájiribeli maman qyzmettik boryshyn óteý kezinde kóz jumdy.
Ol buǵan deiin de birneshe ret kózge túsip, beibit turǵyndardy ajaldan arashalap qalǵan edi.
Oblystyq Tótenshe jaǵdai departamentiniń málim etkenindei osydan eki jyl buryn, kóktem kezinde Tarazdaǵy nómir 3-shi órt sóndirý brigadasynyń qutqarýshysy Eldos qaladaǵy kópqabatty úide tutanǵan qyzyl jalyndy aýyzdyqtaýǵa atsalysyp, tútinge tunshyǵa jazdaǵan 5 adamdy qutqaryp qalady.
Esikti buzyp úidegi eki áiel men úsh kishkentai balany tilsiz jaýdyń tutqynynan bosatqan Eldos otbasynda da, áriptesteriniń ortasynda syily edi.
Oblystyq Tótenshe jaǵdai departamentiniń basshylyǵy Eldostyń órttiń aldyn-alýdaǵy qarym-qabiletin erekshe atap ótipti. Aitalyq osydan úsh jyl buryn Jambyl aýdanyndaǵy taý bókterlep tutanǵan órtti tejeýde Eldostyń strategiialyq qyraǵylyǵy airyqsha baiqalǵan. Órttiń betalysyn ańdaǵan Eldos jeke quramdy durys baǵytqa ornalastyryp, sonyń negizinde tilsiz jaýdyń Qyrǵyzstan aýmaǵyna taralýyn toqtatqan.
...
Osy tragediiada qaza tapqan Táńirbergen Tórebekov Tarazdaǵy №1 órt sóndirý bóliminiń serjanty edi. Osy salanyń qazanynda qainap, qajyr-qabiletimen erekshelengen qutqarýshynyń jumys ótili 20 jylǵa jýyqtap qalǵan-tuǵyn.
Áriptesteriniń aitýynsha Táńirbergen qiyndyqtan qoryqpaityn azamat, ottyń ortasyna qoiyp ketip, talai azamatty tilsiz jaýdan qutqaryp qalǵany jurttyń jadynda.
Osydan úsh jyl buryn Tarazdyń qaq ortasyndaǵy kópqabatty úi órtke oranyp, 40-qa jýyq turǵyn tilsiz jaýdyń tutqynynda qalady. Táńirbergen Tórebekov bastaǵan órt sóndirýshilerdiń kásibi biliktiliginiń arqasynda 55 sharshy metrdi sharpyǵan órt tez arada sóndirilip, tutas úige taralýynyń jolyn kesedi.
Tótenshe jaǵdai departamentiniń málim etkenindei marqum Táńirbergen Tórebekov bastaǵan órt sóndirýshi quram sońǵy eki jylda 2 myńnan asa turǵyndy tilsiz jaýdan arashalap, talai alapat órtti aýyzdyqtaǵan.
...
Jambyl oblysy TJD «ÓSjAQJQ» MM bastyǵynyń orynbasary 45 jasar Meiirjan Aimanov ta osy salanyń otymen kirip, kúlimen shyǵyp júrgen mamannyń biri edi. Marqum zeinetke shyǵatyn jasqa jaqyndap qalsa da jumysynda qalýdy jón kórgen. Kórgen-bilgenin jas mamandarmen bólisip, olarǵa durys jol kórsetýge tyrysqan.
Jambyldaǵy jarylys kezinde turǵyndardy evakýatsiialaý týraly jedel sheshim qabyldaǵan da osy Aimanov bolatyn. Sonyń arqasynda jarylysqa jaqyn jatqan eldi-mekenderden 800-ge tarta turǵyn der kezinde kóshirilip, aman qaldy.
...
Elimizdiń túkpir-túkpirinde ornalasqan órt sóndirý bólimsheleri budan bólek Jambyl oblysy Tótenshe jaǵdai departamentine qarasty Órt sóndirý basshysynyń orynbasary Aleksandr Mikropýlony, Taraz qalasy 3-ÓSB órt sóndirýshisi Arnur Temirbolatovty eske alyp, týǵan-týystaryna qaiǵyra kóńil aitty.
Memleket basshysy Qasym-Jomart Toqaev 29-shy tamyzdy – Jalpyulttyq aza tutý kúni dep jariialaǵan bolatyn.
Eń bastysy batyrlardyń erligi eleýsiz qalǵan joq.
Memleket basshysy oqiǵanyń bel ortasynda júrip, jan tapsyrǵan órt sóndirýshiler men qutqarýshylardy marapattady. Jambyl oblysy TJD órt sóndirý ári apattyq-qutqarý jumysy bastyǵynyń orynbasary Meiirjan Aimanovqa "qyzmettik boryshyn óteýde kórsetken erligi úshin "Halyq qaharmany" ataǵy berildi.
Prezidenttiń taǵy bir qaýlysy boiynsha óńirdiń Órt sóndirý ári apattyq-qutqarý qyzmetiniń kezekshi mamany Aleksandr Mikropýloǵa I dárejeli "Aibyn" ordeni berildi.
Jambyl oblysy TJD-nyń ózge de qyzmetkerleri Táńirbergen Tórebekovke, Arnur Temirbolatovqa jáne Eldos Sandybaevqa III dárejeli "Aibyn" ordeni taǵaiyndaldy.
