وسى ورايدا ءبىزدىڭ رەداكسيا اجالمەن ارپالىسقان باتىرلاردى ءقازاقتىلدى اۋديتورياعا تانىس ەتىپ، ولاردىڭ ءبىرقاتارىنىڭ ءومىر جولىن توقتالا كەتكەندى ءجون كوردى.
26-شى تامىزدا جامبىل وبلىسىنىڭ بايزاق اۋدانىندا ءوق-دارى قويماسى جارىلدى. تراگەديا 14 ادامنىڭ ءومىرىن قيدى، 100-گە تارتا تۇرعىن جاراقات الدى. ال جوعالعان ءورت سوندىرۋشىلەردى ىزدەۋ جۇمىسى ءالى جالعاسىپ جاتىر.
اپاتتىڭ الدىن-الۋ ءۇشىن وقيعا ورنىنا جەدەل جەتكەن ءورت سوندىرۋشىلەر مەن قۇتقارۋشىلاردىڭ كوپشىلىگى جان تاپسىردى.
Dalanews.kz ءتىلشىسى ەسىمى ەل ەسىندە قالۋى ءتيىس باتىرلاردى ءقازاقتىلدى وقىرمانعا تانىس ەتۋدى پارىز دەپ تاپتى:
ەلدوس ساندىبايەۆ، جامبىل وبلىسى، تاراز قالاسى توتەنشە جاعداي دەپارتامەنتىنىڭ ءاعا-ورت ءسوندىرۋشى-قۇتقارۋشىسى.
ەلدوس وقيعا ورىن ورنىنا العاشقى بولىپ جەتىپتى. توتەنشە جاعداي قىزمەتىندە 2013 جىلدان بەرى ىستەيتىن تاجىريبەلى مامان قىزمەتتىك بورىشىن وتەۋ كەزىندە كوز جۇمدى.
ول بۇعان دەيىن دە بىرنەشە رەت كوزگە ءتۇسىپ، بەيبىت تۇرعىنداردى اجالدان اراشالاپ قالعان ەدى.
وبلىستىق توتەنشە جاعداي دەپارتامەنتىنىڭ ءمالىم ەتكەنىندەي وسىدان ەكى جىل بۇرىن، كوكتەم كەزىندە تارازداعى ءنومىر 3ء-شى ءورت ءسوندىرۋ بريگاداسىنىڭ قۇتقارۋشىسى ەلدوس قالاداعى كوپقاباتتى ۇيدە تۇتانعان قىزىل جالىندى اۋىزدىقتاۋعا اتسالىسىپ، تۇتىنگە تۇنشىعا جازداعان 5 ادامدى قۇتقارىپ قالادى.
ەسىكتى بۇزىپ ۇيدەگى ەكى ايەل مەن ءۇش كىشكەنتاي بالانى ءتىلسىز جاۋدىڭ تۇتقىنىنان بوساتقان ەلدوس وتباسىندا دا، ارىپتەستەرىنىڭ ورتاسىندا سىيلى ەدى.
وبلىستىق توتەنشە جاعداي دەپارتامەنتىنىڭ باسشىلىعى ەلدوستىڭ ءورتتىڭ الدىن-الۋداعى قارىم-قابىلەتىن ەرەكشە اتاپ ءوتىپتى. ايتالىق وسىدان ءۇش جىل بۇرىن جامبىل اۋدانىنداعى تاۋ بوكتەرلەپ تۇتانعان ءورتتى تەجەۋدە ەلدوستىڭ ستراتەگيالىق قىراعىلىعى ايرىقشا بايقالعان. ءورتتىڭ بەتالىسىن اڭداعان ەلدوس جەكە قۇرامدى دۇرىس باعىتقا ورنالاستىرىپ، سونىڭ نەگىزىندە ءتىلسىز جاۋدىڭ قىرعىزستان اۋماعىنا تارالۋىن توقتاتقان.
...
وسى تراگەديادا قازا تاپقان تاڭىربەرگەن تورەبەكوۆ تارازداعى №1 ءورت ءسوندىرۋ ءبولىمىنىڭ سەرجانتى ەدى. وسى سالانىڭ قازانىندا قايناپ، قاجىر-قابىلەتىمەن ەرەكشەلەنگەن قۇتقارۋشىنىڭ جۇمىس ءوتىلى 20 جىلعا جۋىقتاپ قالعان-تۇعىن.
ارىپتەستەرىنىڭ ايتۋىنشا تاڭىربەرگەن قيىندىقتان قورىقپايتىن ازامات، وتتىڭ ورتاسىنا قويىپ كەتىپ، تالاي ازاماتتى ءتىلسىز جاۋدان قۇتقارىپ قالعانى جۇرتتىڭ جادىندا.
وسىدان ءۇش جىل بۇرىن تارازدىڭ قاق ورتاسىنداعى كوپقاباتتى ءۇي ورتكە ورانىپ، 40-قا جۋىق تۇرعىن ءتىلسىز جاۋدىڭ تۇتقىنىندا قالادى. تاڭىربەرگەن تورەبەكوۆ باستاعان ءورت سوندىرۋشىلەردىڭ كاسىبي بىلىكتىلىگىنىڭ ارقاسىندا 55 شارشى مەتردى شارپىعان ءورت تەز ارادا ءسوندىرىلىپ، تۇتاس ۇيگە تارالۋىنىڭ جولىن كەسەدى.
توتەنشە جاعداي دەپارتامەنتىنىڭ ءمالىم ەتكەنىندەي مارقۇم تاڭىربەرگەن تورەبەكوۆ باستاعان ءورت ءسوندىرۋشى قۇرام سوڭعى ەكى جىلدا 2 مىڭنان اسا تۇرعىندى ءتىلسىز جاۋدان اراشالاپ، تالاي الاپات ءورتتى اۋىزدىقتاعان.
...
جامبىل وبلىسى تجد «ءوسجاقجق» مم باستىعىنىڭ ورىنباسارى 45 جاسار مەيىرجان ايمانوۆ تا وسى سالانىڭ وتىمەن كىرىپ، كۇلىمەن شىعىپ جۇرگەن ماماننىڭ ءبىرى ەدى. مارقۇم زەينەتكە شىعاتىن جاسقا جاقىنداپ قالسا دا جۇمىسىندا قالۋدى ءجون كورگەن. كورگەن-بىلگەنىن جاس ماماندارمەن ءبولىسىپ، ولارعا دۇرىس جول كورسەتۋگە تىرىسقان.
جامبىلداعى جارىلىس كەزىندە تۇرعىنداردى ەۆاكۋاسيالاۋ تۋرالى جەدەل شەشىم قابىلداعان دا وسى ايمانوۆ بولاتىن. سونىڭ ارقاسىندا جارىلىسقا جاقىن جاتقان ەلدى-مەكەندەردەن 800-گە تارتا تۇرعىن دەر كەزىندە كوشىرىلىپ، امان قالدى.
...
ەلىمىزدىڭ تۇكپىر-تۇكپىرىندە ورنالاسقان ءورت ءسوندىرۋ بولىمشەلەرى بۇدان بولەك جامبىل وبلىسى توتەنشە جاعداي دەپارتامەنتىنە قاراستى ءورت ءسوندىرۋ باسشىسىنىڭ ورىنباسارى الەكساندر ميكروپۋلونى، تاراز قالاسى 3ء-وسب ءورت ءسوندىرۋشىسى ارنۇر تەمىربولاتوۆتى ەسكە الىپ، تۋعان-تۋىستارىنا قايعىرا كوڭىل ايتتى.
مەملەكەت باسشىسى قاسىم-جومارت توقايەۆ 29-شى تامىزدى – جالپىۇلتتىق ازا تۇتۋ كۇنى دەپ جاريالاعان بولاتىن.
ەڭ باستىسى باتىرلاردىڭ ەرلىگى ەلەۋسىز قالعان جوق.
مەملەكەت باسشىسى وقيعانىڭ بەل ورتاسىندا ءجۇرىپ، جان تاپسىرعان ءورت سوندىرۋشىلەر مەن قۇتقارۋشىلاردى ماراپاتتادى. جامبىل وبلىسى تجد ءورت ءسوندىرۋ ءارى اپاتتىق-قۇتقارۋ جۇمىسى باستىعىنىڭ ورىنباسارى مەيىرجان ايمانوۆقا "قىزمەتتىك بورىشىن وتەۋدە كورسەتكەن ەرلىگى ءۇشىن "حالىق قاھارمانى" اتاعى بەرىلدى.
پرەزيدەنتتىڭ تاعى ءبىر قاۋلىسى بويىنشا ءوڭىردىڭ ءورت ءسوندىرۋ ءارى اپاتتىق-قۇتقارۋ قىزمەتىنىڭ كەزەكشى مامانى الەكساندر ميكروپۋلوعا I دارەجەلى "ايبىن" وردەنى بەرىلدى.
جامبىل وبلىسى تجد-نىڭ وزگە دە قىزمەتكەرلەرى تاڭىربەرگەن تورەبەكوۆكە، ارنۇر تەمىربولاتوۆقا جانە ەلدوس ساندىبايەۆقا III دارەجەلى "ايبىن" وردەنى تاعايىندالدى.
