Úkimettik jumys toby jaǵdaıdy saraptap, baǵalaý jáne jedel sharalar qabyldaý úshin Jambyl oblysyna jiberildi, – dep habarlaıdy Dalanews.kz.
Premer-mınıstr Oljas Bektenovtiń tapsyrmasy boıynsha Jambyl oblysynda oryn alǵan jer silkinisine baılanysty jergilikti atqarýshy organdarǵa jaǵdaıdy taldaý, jedel is-sharalar qabyldaý, keltirilgen shyǵyndy anyqtaý jáne baǵalaý máselelerinde kómek kórsetý úshin tótenshe jaǵdaılar vıse-mınıstri bastaǵan úkimettik jumys toby óńirge jiberildi.
Sondaı-aq, jumys toby quramynda – Ónerkásip jáne qurylys mınıstrligi Qurylys jáne TKSH isteri komıtetiniń tóraǵasy, «QazQSǴZI» AQ fılıalynyń basshylyǵy, Úkimet Apparatynyń ókilderi bar.
Premer-mınıstr birinshi kezekte áleýmettik jáne tirshilikti qamtamasyz etetin nysandardaǵy, jol qatynastary men ónerkásip kásiporyndaryndaǵy jaǵdaıdy basym tártippen baqylaýda ustaýdy tapsyrdy. Sonymen qatar nysandardy tekserý, shyǵyndardy baǵalaý jáne derekterdi jınaý boıynsha mobıldi toptardyń sanyn kóbeıtýdi tapsyrdy.
Jer asty dúmpýiniń joǵary qarqyny 5 bal boldy, bul Merki aýdanyndaǵy Merki aýylynda tirkeldi.
"Oblys ákiminiń tapsyrmasyna sáıkes jedel shtab quryldy. Oblys ákiminiń orynbasary Qanatbek Mádibek tóraǵalyq etken onyń quramyna azamattyq qorǵaý qyzmetiniń, jergilikti atqarýshy organdardyń, tıisti vedomstvolardyń ókilderi kirdi.Zardap shekkender týraly aqparat joq. Aýdandardaǵy nysandar shtattyq rejımde jumys istep jatyr", - dep jazylǵan buǵan deıingi ákimdik habarlamasynda.
