Jambyl oblysynda pedagogterdiń biliktiligin arttyrýǵa arnalǵan 180 mln teńgelik memlekettik satyp alý talaptary qaita ózgertildi. Alaida jańartylǵan qujatta burynǵy shekteýlerdiń basym bóligi sol kúiinde qalǵan, dep habarlaidy Dalanews.kz.
Goszakupturaly telegram arnasynyń paraqshasynyń málimetinshe, oblystyq bilim basqarmasy muǵalimderdiń tsifrlyq quzyreti men fýnktsionaldyq saýattylyǵyn arttyrý qyzmetin satyp alýdy josparlaǵan. Bul qyzmet interaktivti platforma men arnaiy oqý trenajerin qoldaný arqyly júzege asýy tiis bolǵan.
Alǵashqy konkýrs barysynda qujattaǵy birqatar talapqa Ishki memlekettik aýdit departamenti (DVGA) nazar aýdaryp, satyp alý rásimin toqtatqan. Budan keiin tapsyrys berýshi qujattardy qaita qarap, tenderdi qaita jariialaǵan.
Alaida jańartylǵan nusqada tehnikalyq sipattama aitarlyqtai ózgermegen. Qujatta onlain-platforma men oqý trenajerine qoiylatyn talaptar óte naqty ári egjei-tegjeili jazylǵan. Mundai sipattama belgili bir ónimge nemese jetkizýshige ǵana sáikes kelýi múmkin.
Sonymen qatar negizgi talaptardyń biri retinde mektepti basqarýǵa arnalǵan simýliatsiialyq oiyn men fýnktsionaldyq saýattylyqty damytýǵa baǵyttalǵan onlain-trenajerdiń bolýy saqtalǵan.
Qujatta kadrlarǵa qatysty talaptar da ózgertilgenimen, jańa shekteýler engizilgen. Máselen, ǵylymi dárejesi bar mamandardyń ornyna sheteldik ýniversitetterden bilim alǵan nemese halyqaralyq sertifikattary bar mamandar talap etiledi. Keibir tarmaqtarda TMD elderinde alynǵan diplomdardyń qabyldanbaityny kórsetilgen.
Satyp alý qujattaryndaǵy mundai talaptar naqty bir uiymnyń resýrstary men kadrlyq quramyna sáikes kelýi múmkin ekeni baiqalady. Sonymen birge, platformaǵa qatysty sipattamanyń shamadan tys naqtylanýy qyzmettiń ózinen góri daiyn ónimdi tańdaýǵa basymdyq berilgenin ańǵartady.
Qaita jariialanǵan konkýrsqa qaramastan, negizgi talaptar mazmundyq turǵyda ózgermegen. DVGA tarapynan eskertý jasalǵanymen, túzetýler negizinen formaldy sipatta qalyp, shekteýshi sharttar saqtalyp otyr.
Bul jaǵdai memlekettik satyp alý júiesinde talaptardyń qaita qaralǵanymen, olardyń máni ózgermei qalatyn tájiribe bar ekenin kórsetedi.
