Jambyl oblysynyń ákimi Erbol Qarashókeev Taraz qalasy Áýlieata aýdanyna qarasty Bektóbe turǵyn alabyna baryp, aýlasyn sý basqan turǵyn úilerdi aralady, dep habarlaidy Dalanews.kz.
Qalyń qar erýinen jáne jaýyn-shashyn saldarynan oblys ortalyǵyndaǵy birneshe jeke turǵyn úidiń aýlasyn sý basqan.
Sý tasqynynyń aldyn alý jáne onyń saldaryn joiý jumystaryna 109 adam jáne 40-tan asa tehnika jumyldyrylǵan. Sý basý qaýpin azaitý maqsatynda qum toltyrylǵan qaptar tóselip, shamamen 4-5 tonna inertti material paidalanylǵan.
Uzyndyǵy 250-300 metr qorǵanys bógeti jasalǵan. Sonymen qatar, aýlalar sýdan tazartylyp, aryq-drenaj júieleri mehanikalyq tásilmen arshylǵan.
Erbol Qarashókeev atqarylyp jatqan jumystarmen tanysyp, Taraz qalasy ákimdigine naqty tapsyrmalar berdi.
"Tarazǵa eki kún boiy tolassyz qar jaýdy. Qar qalyńdyǵy 63 santimetrge deiin jetti. Aýa raiy kúrt jylynýyna bailanysty júkteme artyp otyr. Basty maqsat – turǵyndardyń qaýipsizdigin qamtamasyz etý. Oblys ortalyǵyndaǵy aryq-atyzdar men kanaldardy tolyq tekserip, ýaqtyly tazartý qajet. Kóktem mezgili jaqyndap keledi. Sondyqtan mundai jaǵdai qaitalanýy múmkin", – dedi óńir basshysy.
