جامبىل وبلىسىنىڭ اكىمى ەربول قاراشوكەيەۆ تاراز قالاسى اۋليەاتا اۋدانىنا قاراستى بەكتوبە تۇرعىن الابىنا بارىپ، اۋلاسىن سۋ باسقان تۇرعىن ۇيلەردى ارالادى، دەپ حابارلايدى Dalanews.kz.
قالىڭ قار ەرۋىنەن جانە جاۋىن-شاشىن سالدارىنان وبلىس ورتالىعىنداعى بىرنەشە جەكە تۇرعىن ءۇيدىڭ اۋلاسىن سۋ باسقان.
سۋ تاسقىنىنىڭ الدىن الۋ جانە ونىڭ سالدارىن جويۋ جۇمىستارىنا 109 ادام جانە 40-تان اسا تەحنيكا جۇمىلدىرىلعان. سۋ باسۋ ءقاۋپىن ازايتۋ ماقساتىندا قۇم تولتىرىلعان قاپتار توسەلىپ، شامامەن 4-5 توننا ينەرتتى ماتەريال پايدالانىلعان.
ۇزىندىعى 250-300 مەتر قورعانىس بوگەتى جاسالعان. سونىمەن قاتار، اۋلالار سۋدان تازارتىلىپ، ارىق-درەناج جۇيەلەرى مەحانيكالىق تاسىلمەن ارشىلعان.
ەربول قاراشوكەيەۆ اتقارىلىپ جاتقان جۇمىستارمەن تانىسىپ، تاراز قالاسى اكىمدىگىنە ناقتى تاپسىرمالار بەردى.
"تارازعا ەكى كۇن بويى تولاسسىز قار جاۋدى. قار قالىڭدىعى 63 سانتيمەترگە دەيىن جەتتى. اۋا رايى كۇرت جىلىنۋىنا بايلانىستى جۇكتەمە ارتىپ وتىر. باستى ماقسات – تۇرعىنداردىڭ قاۋىپسىزدىگىن قامتاماسىز ەتۋ. وبلىس ورتالىعىنداعى ارىق-اتىزدار مەن كانالداردى تولىق تەكسەرىپ، ۋاقتىلى تازارتۋ قاجەت. كوكتەم مەزگىلى جاقىنداپ كەلەدى. سوندىقتان مۇنداي جاعداي قايتالانۋى مۇمكىن"، – دەدى ءوڭىر باسشىسى.
