Jambyl oblysynyń Qordai aýdanyndaǵy Stepnov aýyldyq okrýginiń sharýalary egis naýqany qarsańynda sý tapshylyǵyna tap boldy, dep habarlaidy Dalanews.kz.
Daiyn turǵan alqaptar men satyp alynǵan tuqymǵa qaramastan, sý bolmaýy aýyl sharýashylyǵy jumystary men bolashaq ónimge qaýip tóndirip otyr.
Ne boldy?
KTK telearnasynyń málimetinshe, «Qazsýshar» kásiporny sharýalarmen «Oń jaq tarmaq» kanaly arqyly sý berý jóninde kelisimshart jasaýdan bas tartqan. Aýyldaǵy sharýa qojalyqtary bul sheshimniń sebebi túsindirilmegenin aityp, jaýapty mekememen kelissóz júrgize almaǵandaryn jetkizdi.
«Voshod» sharýa qojalyǵynyń ókili Nikolai Cherpak sharýalardyń maýsymǵa aldyn ala qamdanǵanyn aitady. Olar tuqym alyp, jerdi óńdep, tehnikaǵa deiin lizingke rásimdegen. Alaida sý tapshylyǵy búkil eńbekti zaia ketirýi múmkin.
Bilik ne deidi?
Sharýalardyń shaǵymynan keiin jaýapty organdar sý az qajet etetin daqyldarǵa kóshýge keńes bergen. Biraq diqandar bul usynys kesh aitylǵanyn aitady. Óitkeni egis naýqany bastalyp ketken, endi daqyl túrin ózgertý múmkin emes.
«Rýslan» sharýa qojalyǵynyń ókili Baqtiiar Musaevtyń sózinshe, ýaqyt ótip ketken, al aldaǵy áreket qalai bolatyny belgisiz.
Sý nege jetispei jatyr?
Jambyl oblysy sý qorynyń shamamen 80 paiyzyn kórshi Qyrǵyzstannan alady. Biyl sol jaqtan keletin sý kólemi azaiady degen boljam bar.
«Qazsýshar» mekemesiniń oblystyq filialy ókilderiniń aitýynsha, sý tapshylyǵy shamamen myńǵa jýyq sharýashylyqqa áser etýi múmkin. Onyń ishinde Baizaq, Talas jáne Jambyl aýdandary da bar. Qordai aýdanynda keibir sharýalar balama kanaldar arqyly sý alýy múmkin, biraq mundai múmkindik bárine birdei qarastyrylmaǵan.
Qansha sý qajet?
Aldyn ala derek boiynsha, Qyrǵyzstandaǵy Orto-Tokoi sý qoimasynda byltyrmen salystyrǵanda shamamen 100 mln tekshe metrge az sý jinalǵan. Biyl bólinetin jalpy sý kólemi 350 mln tekshe metr shamasynda. Bul barlyq egistikke tolyq jetpeidi.
Qandai saldary bolýy múmkin?
Aimaqta negizinen júgeri men jońyshqa ósiriledi. Bul daqyldar turaqty sýarýdy qajet etedi. Sý tapshylyǵy olardyń ónimdiligine tikelei áser etýi múmkin.
Jalpy, Jambyl oblysyndaǵy sý máselesi jyl saiyn qaitalanyp keledi. Mamandar jańa sý qoimalaryn salý jaǵdaidy jeńildetýi múmkin ekenin aitady. Alaida bul jobalar ázirge bastapqy kezeńde ǵana.
