Jambyl oblysy ákimdigine qarasty bilim basqarmasy taǵy da kúmán týdyratyn memlekettik satyp alý konkýrsyn jariialady. Buǵan deiin de osyǵan uqsas jaǵdai qoǵam nazaryn aýdaryp, keiin konkýrs kúshin joiǵan bolatyn. Alaida biyl basqarma qaitadan zań talaptaryna qaishy kelýi múmkin jańa satyp alýdy iske qosqan, dep habarlaidy Dalanews.kz.
Goszakupturaly paraqshasy usynǵan málimetke sáikes, bilim basqarmasy shamamen 180 million teńgege pedagogterdiń biliktiligin arttyrý qyzmetin satyp almaq.
"Atap aitqanda, bul – tsifrlyq quzyretter men fýnktsionaldyq saýattylyqty damytýǵa arnalǵan onlain-platforma men arnaiy oqý trenajerlaryn usyný qyzmeti. Platformada beinesabaqtar, simýliatsiialar, interaktivti tapsyrmalar jáne UBT-ǵa daiyndyq testteri qamtylýy tiis. Oqý sońynda muǵalimderge sertifikat beriledi", - delingen jazbada.
Alaida derekkózdiń aitýynsha, konkýrs talaptary básekelestikti shekteidi jáne naqty bir jetkizýshige yńǵailanǵan bolýy múmkin. Qujatta kórsetilgen materialdyq talaptardyń sany altaý, olardyń barlyǵy shamadan tys ári shekteýshi sipatta dep baǵalanǵan.
"Mysaly, talaptardyń biri - qazaqstandyq bilim berý júiesine beiimdelgen arnaiy onlain-trenajerdyń bolýy. Mundai ónimdi usynatyn kompaniialardyń sany óte az, tipti bireý ǵana bolýy múmkin ekeni aitylyp otyr. Sonymen qatar halyqaralyq seriktesterdiń bolýy, belgili bir reitingtegi uiymdarmen jumys isteý siiaqty talaptar da negizsiz dep tanylýda.
Muǵalimderdi onlain formatta oqytý úshin bundai kúrdeli talaptar mindetti emes. Qarapaiym beinekýrstar nemese halyqaralyq platformalar (mysaly, Coursera) da jetkilikti bolar edi", - deidi derekkóz.
Taǵy bir daýly másele - kadrlyq talaptar. Konkýrsta ǵylymi dárejesi bar birneshe maman talap etiledi, biraq olardyń naqty qai salada bolýy mańyzdy emes. Bul da talaptardyń formaldy túrde jazylǵanyn kórsetedi.
"Konkýrs 2 naýryzda jariialanǵan. Arada úsh kún ótken soń áleýetti jetkizýshiler tarapynan alǵashqy eskertýler túse bastaǵan. Olar talaptardyń shekten tys ekenin jáne táýelsiz kompaniialardyń qatysýyna kedergi keltiretinin atap ótken. Alaida uiymdastyrýshy tarap zańǵa silteme jasaýmen shektelip, naqty túsindirme bermegen jáne talaptardy ózgertýden bas tartqan", - dep qosty atalǵan paraqsha.
Keiinnen konkýrs qaita jariialanǵan. Mundai jaǵdaida aldyńǵy talqylaýlar men pikirler joiylyp ketedi. Jańa konkýrs 16 naýryzda shyqqanymen, oǵan qatysty ázirge pikirler tirkelmegen.
"Aita keteiik, 2024 jyly dál osyndai konkýrs jariialanyp, eki aptadan keiin kúshin joiǵan. Ol kezde de jetkizýshiler tarapynan kóp syn aitylyp, ýákiletti organ talaptardy negizsiz joǵary dep tanyǵan edi", - dedi derekkóz.
Jalpy, mamandardyń qorytyndysy boiynsha, qazirgi konkýrs talaptary áli de ózgerissiz qalyp otyr. Bul jaǵdai satyp alýdyń ashyqtyǵyna kúmán keltiredi jáne biýdjet qarajatynyń zańsyz jumsalý qaýpin arttyrady.
