Jambyl oblysy Sarysý aýdandyq soty kelinine til tigizip, tynyshtyǵyn buzǵan er adamǵa qatysty ákimshilik isti qarady. Ol buǵan deiin de otbasyndaǵy tártip buzǵany úshin jaýapqa tartylǵan eken, dep habarlaidy Dalanews.kz.
Sot málimetinshe, er adam 2024 jyldyń maýsym aiynda kelinine mas kúiinde balaǵat sózder aityp, quqyq buzýshylyqqa qaita barǵan. Buǵan deiin ol Ákimshilik quqyq buzýshylyq týraly kodekstiń 73-babynyń 1-bóligimen jaýapkershilikke tartylǵan.
Sot otyrysynda quqyq buzýshy óz kinásin moiyndap, ókinish bildirip, keshirim surady. Al jábirlenýshi onyń mas kúiinde balaǵattaǵanyn rastaǵanymen, keshirim beretinin aitty.
Is materialdaryna sáikes, quqyq buzýshynyń kinási jábirlenýshiniń aryzy, hattama jáne quqyqtyq statistika organdarynyń málimetterimen tolyq dáleldendi.
Nátijesinde, sot er adamdy ÁQBtK-niń 73-babynyń 2-bóligi boiynsha kináli dep tanyp, 10 táýlikke ákimshilik qamaýǵa alý týraly sheshim shyǵardy. Qaýly zańdy kúshine endi.
