Qazaqstan Bas prokýratýrasy terrorizmdi nasihattaý, terakt jasaýǵa úndeý jáne jalǵan habar taratý qatań qylmystyq jaýapkershilikke ákeletinin taǵy da eske saldy, dep habarlaidy Dalanews.kz.
Qadaǵalaý organynyń málimetinshe, Qylmystyq kodekstiń 256-baby terrorizmdi nasihattaý men oǵan shaqyrý áreketteri úshin 5 jyldan 9 jylǵa deiin bas bostandyǵynan aiyrýdy jáne múlkin tárkileýdi qarastyrady. Eger mundai aqparat buqaralyq aqparat quraldary, internet nemese onlain-platformalar arqyly taratylsa, jaza merzimi 12 jylǵa deiin uzarýy múmkin.
Vedomstvo ókilderi jaýapkershilik tek tikelei úndeýlerge ǵana emes, teraktilerdi aqtaý, qoldaý nemese maquldaýǵa da qatysty ekenin atap ótti. Áleýmettik jelilerdegi pikir, jazba nemese bólisken kontenttiń ózi zań aldynda jaýapqa tartýǵa negiz bola alady.
Keiingi ýaqytta internette "minalaý" týraly jalǵan habarlamalar jiilegeni de aityldy. Mundai málimetterdiń árqaisysy quqyq qorǵaý organdary tarapynan shynaiy qaýip retinde tekseriledi.
Qadaǵalaý organy quqyq buzýshylardyń daýysyn ózgertý nemese IP-mekenjaiyn jasyrý arqyly jaýapkershilikten qutylamyz degen oiy qate ekenin qatań eskertti. Tsifrlyq tehnologiialar damyǵan qazirgi zamanda quqyq buzýshynyń jeke basyn anyqtaý – tek ýaqyt máselesi.
