QR Qoǵamdyq múddelerdi qorǵaý qyzmeti basqarmasynyń bastyǵy Bekjan Qaramanov daýys berý kezinde zań buzýshylyqtar bolmaǵanyn málimdedi, dep jazady Dalanews.kz.
“Búgin prokýratýra organdaryna respýblikalyq referendýmǵa qatysty ótinishter túsken joq. Sondai-aq qazirgi ýaqytta sot organdaryna da talap aryzdar engizilmegen”, - dedi spiker.
QR IIM resmi ókili Shyńǵys Alekeshevtiń aitýynsha, referendým ýchaskelerindegi oqiǵalarǵa ýaqytyly den qoiý úshin árbir aýdanda mobildi jedel-tergeý toptary quryldy.
“Politsiianyń jedel basqarý ortalyqtarynyń beinebaqylaý kameralarynyń kómegimen referendým ýchaskelerine irgeles aýmaqtardy baqylaý kúsheitildi. Jalpy, qazirgi ýaqytta referendým ýchaskelerindegi jaǵdai turaqty. Qoǵamdyq tártipti buzý faktileri tirkelgen joq”, - dedi IIM resmi ókili.
Eske salaiyq, daýys berý tizimine 12,3 millionǵa jýyq qazaqstandyq engizilgen.
Referendýmǵa 30 shet memleket pen tórt halyqaralyq uiymnyń (Táýelsiz Memleketter Dostastyǵy, Shanhai yntymaqtastyq uiymy, Túrki memleketteri uiymy, Aziiadaǵy ózara is-qimyl jáne senim sharalary jónindegi keńes) atynan 177 baiqaýshy qatysady.
Daýys berý barysyn 14 memlekettiń ortalyq sailaý organdarynyń ókilderi, sonyń ishinde Ázirbaijan, Belarýs, Tájikstan jáne Ózbekstan ortalyq sailaý organdarynyń tóraǵalary da baqylap otyr.
Qazaqstan Respýblikasynyń Syrtqy ister ministrligi 37 elden 200 sheteldik jýrnalisterdi akkredittedi, olar da respýblikalyq referendýmdy baqylap, aqparat taratady.
Elimizde barlyǵy 10 323 sailaý ýchaskesi jumys isteidi, sonymen qatar, 59 elde sheteldik mekemelerde ashylǵan 74 sailaý ýchaskesi bar. Referendým nátijeleri daýys berý kúninen bastap jeti kúnnen keshiktirilmei buqaralyq aqparat quraldarynda jariialanady.
