Perizat Qairat pen Ǵaini Alashbaevaǵa qatysty qylmystyq is boiynsha jábirlenýshi Rýslan Týmashev sotta sottalýshylardyń jazasyn jumsartýǵa úzildi-kesildi qarsy ekenin málimdedi, dep habarlaidy Dalanews.kz.
"Qarajatty Biz Birgemiz qaiyrymdylyq qorynyń shotyna mobildi qosymsha arqyly aýdardym. Bul qordyń bar ekenin alǵash ret ekonomikalyq tergeý departamentiniń qyzmetkerlerinen estidim. Aiyptaýshy taraptyń ustanymyn tolyq qoldaimyn, prokýrordyń ustanymymen kelisemin", – dedi ol.
Týmashevtyń aitýynsha, keibir jábirlenýshiler sottalýshylardyń jasyna nemese jeke jaǵdaiyna bailanysty jeńil jaza qoldanýdy surap jatyr. Alaida ol mundai usynystarǵa úzildi-kesildi qarsy.
"Mundai áreketterge múlde jol berilmeýi kerek. Buǵan tosqaýyl qoiylýy tiis", – dep qosty jábirlenýshi.
Ol sonymen qatar óziniń azamattyq talabyn da qanaǵattandyrýdy surady.
"Nelikten anasy qyzyn toqtatpady?"
Taǵy bir jábirlenýshi Ámina Aimaǵanbetova qorǵa 1 million teńge aýdarǵanyn aitty. Ol Perizat Qairattyń anasyn qyzyna der kezinde toqtaý salmaǵany úshin aiyptady.
"Meniń oiymsha, barynsha qatań jaza qoldaný qajet. Anasy milliardtaǵan aqshany iemdenip júrgen qyzyn nege toqtatpaǵan?", – dep narazylyǵyn bildirdi ol.
Aiyptaý tarapy ne surady?
Aita keteiik, prokýror Perizat Qairatty 10 jylǵa bas bostandyǵynan aiyrýdy, al onyń anasy Ǵaini Alashbaevany 8 jylǵa sottaýdy surap otyr.
