Aldymen oblys ákimi aýyl ortalyǵyndaǵy kópqabatty turǵyn úilerdiń abattandyrý, kógaldandyrý, tazalyq jumystarymen tanysty. Belgili bolǵandai, aýyl ortalyǵyndaǵy eki qabatty birqatar úilerdiń qas betterin árleý, ákteý, syrlaý jumystary múldem júrgizilmegen. Tazalyq jumystary da syn kótermeidi. Aýla turǵyndarymen tildesken óńir basshysy árbir turǵynnyń jeke jaýapkershiligin de esterine saldy.
«Myna ǵimarattardyń qazirgi kórinisi óte nashar. Árkim óz aýlasyndaǵy ǵimarattardyń tazalyǵyna jaýapty bolýy kerek. Úkimet gaz ákelip beredi, sý tartyp beredi, qalǵan jumystardy ózderińiz isteýlerińiz kerek. Myna úilerdiń jaǵdaiy syn kótermeidi. Bárin retteý kerek. Men bul aýyldy jeke baqylaýyma alamyn. Ákimderdiń uiymdastyrý jumystary óte tómen», - dedi Janseiit Qanseituly.
Munan soń, ákim tutynýshylar úiinde ornalasqan shashtaraz zaly men azyq-túlik dúkeniniń jumysymen tanysty. Ondaǵy jaǵdai sanitarlyq talapqa sai kelmeitinin kórip, bul jergilikti biliktiń kemshiligi ekenin atap ótti.
«Biz 21 ǵasyrda ómir súrip jatyrmyz. Órkeniet damyǵan zamanda shashtarazda sý bolmaýy qalai? Sanitarlyq talapqa sai bolý kerek. Bul kemshilikter ákimmen turǵyndar arasynda bailanys joqtyǵynan oryn alyp otyr. Myna jerdiń bárin baqylaýǵa qoiamyn, qalai isteisiz soǵan bailanysty qorytyndy shyǵaramyn», - dedi ákim.
Budan bylai oblys basshysy shynaiy jaǵdaimen tanysý úshin aýdandarǵa sapary barysynda jospardan tys nysandarǵa da baratyndyǵyn eskertti. Al búgingi kemshilikti qysqa merzimde oryndaý kerektigin tapsyryp, arnaiy tekseretindigin jetkizdi.
OQO ákiminiń baspasóz qyzmeti
