Búgin bul týraly Shymkenttegi birneshe áleýmettik nysandaǵy qurylys jumystarynyń barysymen tanysqan Ońtústik Qazaqstan oblysynyń ákimi Janseıit Túımebaev málim etti.
Aımaq basshysy eń aldymen Bozaryq shaǵyn aýdanyndaǵy 900 oryndyq mektepke atbasyn burdy. Mundaǵy qurylys jumystary mamyr aıynda bastalǵan bolatyn. Jobanyń jalpy quny 1 mlrd 200 mln teńgeni quraıdy. Nysannyń bas merdigeri «Tur-Ahmet ı kompanıa» JSHS-gi qurylys – montajdaý jumystaryna joǵary qarqynmen kirisip, mektepti 2018 jyldyń sáýir aıynda el ıgiligine beremiz dep otyr. Alaıda oqý, sport jáne ashana bloktarynyń jumystary óndiristik kesteden 20-30 kúnge keshigip júrgizilýde. Oblys ákimi qurylys jumystaryn kestege saı júrgizýdi qatań tapsyrdy.
Munan soń óńir basshysy Bekjan bazary mańyndaǵy jol aıryǵynyń qurylysyna aıaldady. Bas merdiger – «JBI-S» kompanıasy nysandy 2018 jyly paıdalanýǵa bermek. Jol aıryqtyń jalpy quny 1 mlrd 737 mln teńgeni quraıdy.
Ákim nazarynan Temirlan tas joly – Mangeldın kósheleri qıylysyndaǵy jer ústi ótkeli men Qojanov kóshesindegi qurylys jumystary da tys qalǵan joq. Mundaǵy jóndeý jumystary 2015 jyldyń 1 tamyz kúni bastalǵan. Janseıit Qanseıituly ótkeldiń qurylysyna qajetti 51 mln teńgeni tezdetip bólip, jyl sońyna deıin aıaqtaýdy tapsyrdy. Aıta keteıik, mundaǵy qurylys montajdaý jumystarynyń jalpy quny 219 mln teńgeni quraıdy. Merdiger mekeme – «NýrKaz Konstrakshn» JSHS.
Oblys ákimi kútpegen jerden Báıdibek bı jáne Qonaev kóshesiniń qıylysynda ornalasqan «Qazbek» ámbebap bazaryna soqty. Saýdagerlermen tildesken ákim bazardy jyl sońyna deıin Bozaryq shaǵyn aýdany mańynda salynyp jatqan jańa bazarǵa kóshirýdi tapsyrdy.
Qala aralaý barysynda oblys ákimi Baıtursynov kóshesindegi jylý magıstraldy qubyrlaryn almastyrý barysyn da kórip shyqty. Memlekettik "Nurly jol" baǵdarlamasy aıasynda Baıtursynov-Saparbaev-Rysqulov kóshelerindegi magıstraldy jylý qubyry aýystyrylýda. Bul maqsatta 888,4 mıllıon teńge bólingen. Merdiger - "Sıtı-stroı" JSHS. Jóndeletin ýchaskeniń jalpy uzyndyǵy - 5,2 shaqyrym. Qazirgi tańda jumys 4 shaqyrymnan astam jerde júrgizilgen. Ábden tozyǵy jetip, shirigen qubyrlar qaptalǵan jańa qubyrǵa aýystyrylýda. Olar tat baspaıdy jáne jaryq pen tesik paıda bolǵan jaǵdaıda habar beretin quralmen jabdyqtalǵan.
«Oblys ortalyǵyndaǵy negizgi máselelerdiń biri baspana. Sondyqtan qala ortalyǵynda kópqabatty turǵyn úılerdiń qurylysyn kóptep júrgizýimiz qajet. Ekinshi másele – gazben qamtamasyz etý. Qazirgi tańda qalanyń 70 paıyzyn jeke ári jer úıler ornalasqandyqtan olardyń ınfraqurylymdyq qajettiliktermen qamtamasyz etý asa kóp shyǵyndy talap etip otyr»,- dedi Janseıit Qanseıituly.
Oblys basshysy ákimshilik iskerlik ortalyǵyndaǵy komýnaldyq arendalyq turǵyn úıler men 1200 mekteptiń qurylysymen de tanysyp shyǵyp, atqarylǵan sharýalarǵa oń baǵasyn berdi.
Munan soń oblys basshysy Astana dańǵylynyń qurylysy júrip jatqan aýmaqqa keldi. Mundaǵy qurylystyń birinshi tarmaǵy bıyl aıaqtalady. Iaǵnı, Astana dańǵyly Arǵynbekov kóshesine qosylýy tıis. Al kelesi jyly qurylystyń ekinshi kezeńi júzege asyrylady: Ol kezde Astana dańǵyly Ótegenov kóshesine deıin sozylady.
OQO ákiminiń baspasóz qyzmeti
