Qyrǵyzstannyń Osh oblysyna qarasty Nookat aýdanynda 21 jastaǵy Aijanyl Alikaraevanyń jumbaq jaǵdaida qaitys bolýy qoǵam nazaryn aýdardy. Marqumnyń otbasy arada tórt ai ótken soń máiitti eksgýmatsiialaýǵa qol jetkizgen.
Qaiǵyly oqiǵa 19 aqpanda bolǵan. Qyzdyń týystary alǵashqy sot-meditsinalyq saraptama qorytyndysyna kúmán keltirgennen keiin máiitti qaita tekserýdi talap etken.
Alǵashqy saraptamada marqumnyń júkti bolmaǵany kórsetilgen. Alaida ápkesi Ýýlcha Orýnbaevanyń aitýynsha, Aijanyl qaza bolar aldynda anasyna aiaǵy aýyr ekenin dáleldeitin foto jáne beinejazbalar jibergen.
Týystarynyń málimdeýinshe, eksgýmatsiia kezinde marqumnyń keibir ishki aǵzalarynyń joq ekeni anyqtalǵan. Anasy qyzynyń jatyry men bir búireginiń ornynda bolmaǵanyn aityp, olardyń qaida ketkenin anyqtaýdy talap etip otyr.
Kúieýiniń týystary jas kelinshek ózine qol jumsaǵanyn málimdegen. Alaida marqumnyń jaqyndary bul nusqaǵa senbeidi. Olar Aijanyldyń ólimine zorlyq-zombylyq sebep bolýy múmkin dep kúdiktenedi.
Otbasy istiń tórt ai boiy sotqa jetpegenine narazylyq bildirip, oqiǵanyń barlyq mán-jaiy jan-jaqty ári ádil tergelýin surady.
Politsiia ókilderi is boiynsha túpkilikti quqyqtyq baǵa komissiialyq sot-meditsinalyq saraptamanyń qorytyndysy daiyn bolǵannan keiin beriletinin habarlady.
