Qazaqstan Respýblikasy Ishki ister ministrligi mopedterdi tirkeý tártibin túsindirdi, dep habarlaidy Dalanews.kz.
"Mopedti tirkeý úshin turǵylyqty jerińiz boiynsha arnaiy HQKO-ǵa júginý qajet. Jeke basyn kýálandyratyn qujattardy elektrondy túrde usynýǵa bolady. Sondai-aq tehnikalyq qujat nemese mopedtiń tehnikalyq sipattamalary týraly málimetter qajet. Odan keiin ótinish toltyryp, kólik quralyn tekseristen ótkizý jáne memlekettik alymdardy tóleý qajet: mopedti tirkeý úshin – 0,25 AEK, tirkeý kýáligin alý úshin – 1,25 AEK, memlekettik nómir alý úshin – 1,4 AEK", – dep málimdedi IIM departamentiniń bastyǵy, vedomstvonyń resmi ókili Shyńǵys Alekeshev.
Eger kólik quralynyń VIN-kody bolmasa, ol tekseristen keiin beriledi.
"Eger VIN-kod joq bolsa nemese shyǵarylǵan jylyn anyqtaý múmkin bolmasa, bul kod kólik quralyn tekserýden keiin beriledi. Mundai jaǵdaida mopedtiń shyǵarylǵan jyly retinde onyń tekseristen ótken jyly esepke alynady", – dedi IIM ókili.
Sonymen qatar ol mopedterge memlekettik nómir berý qoldanystaǵy tártip boiynsha júrgiziletinin atap ótti. Iaǵni, júie nómirdi avtomatty túrde tańdaidy. Buǵan deiin dál osyndai rásim mototsiklderge qoldanylyp kelgen.
"Jol qozǵalysy týraly" zańǵa sáikes, mopedti basqarý úshin A1 sanatyndaǵy júrgizýshi kýáligi talap etiledi. Alaida, eger júrgizýshiniń A nemese V sanatyndaǵy kýáligi bolsa, ol da mopedti basqarý quqyǵyn rastaidy", – dedi Shyńǵys Alekeshev.
Ministrlik 5 sáýirden keiin tirkelmegen mopedterdi basqarýǵa tyiym salynatynyn eskertti.
"Osyndai quqyq buzýshylyq anyqtalǵan jaǵdaida, Ákimshilik quqyq buzýshylyq týraly kodekstiń 590-babynyń 2-tarmaǵyna sáikes, 10 AEK kóleminde aiyppul qarastyrylǵan", – dep eske saldy ministrlik ókili.
