IQanat Olimpiadasynyń I týry búkil Qazaqstan boiynsha – elimizdiń 170 aýdanynda bastaý aldy! Intellektýaldyq saiysqa aýyldyq eldi mekenderde turatyn 56 myń segizinshi synyp oqýshysy qatysady.
IQanat Olimpiadasynyń ereksheligi – akademiialyq jetistikteri men mekteptegi baǵalaryna qaramastan, árbir balanyń jeńiske jetýge múmkindigi bar. Dástúrli testileýlerden aiyrmashylyǵy – IQanat tapsyrmalary oqýshynyń logikalyq jáne matematikalyq oilaý, oqý saýattylyǵy jáne qazaq tilin meńgerýi syndy qabiletterin baǵalaýǵa baǵyttalǵan.
Birinshi týrda jeńimpaz atanǵan 10 myńǵa jýyq bala ekinshi – oblystyq týrǵa ótip, onyń aiasynda test tapsyrýdan bólek, IQanat jobasynyń úsh kúndik daiyndyq sharasy – qarqyndy bilim berý jáne yntalandyrý treningterine qatysady.
Ekinshi týrda finalǵa ótetin 1000-ǵa jýyq bala aiqyndalady. Finalisterdiń bir bóligi Býrabaidaǵy IQanat mektep-pansionatyna oqýǵa qabyldanyp, olardyń jatyn orny, tamaǵy, formasy men oqý materialdaryna qajetti shyǵyndary túgel óteledi. Finalisterdiń ekinshi bóligi IQanat olimpiadasynan keiingi úsh jyldyq qoldaý baǵdarlamasyna tegin qabyldanyp, onyń aiasynda balalar UBT, halyqaralyq emtihandarǵa belsendi daiyndalady, aǵylshyn tilin, IT daǵdylardy, soft skills, kásipkerlik negizderin meńgeredi. Bul rette balalardyń jetistikteri oqý barysynda da, odan túlep ushqannan keiin de baqylaýda bolady.
Bul múmkindikterdi balalarǵa IQanat jobasynyń qamqorshylary usynyp otyr. Olardyń qatarynda qazaqstandyq iri biznestiń, sondai-aq ShOB ókilderi bolyp tabylatyn, elimizge tanymal 160 kásipker bar.
Joba qamqorshysy Almaz Tóltaev aýyl balalarynyń damýyna ne úshin qarjy quiý qajettigin túsindirdi:
«Men otbasynyń turǵylyqty jeri men qarjylyq múmkindikterine qaramastan, árbir balaǵa sapaly bilim men ol usynatyn múmkindikter qoljetimdi bolýy kerek degen senimdemin, sondyqtan IQanat jobasyn qoldadym. Joba aýyl balalaryna qazirgi ýaqytta eń qajetti daǵdylarǵa júieli túrde oqytady jáne bul óziniń tikelei nátijelerin beredi. IQanat baǵdarlamasymen qamtylǵan balalardyń 90%-y Qazaqstannyń jáne sheteldiń úzdik ýniversitetterine grantpen oqýǵa qabyldanýda. Qazir IQanat túlekteri álemniń 17 elinde bilim alyp jatyr. Bul jobaǵa qosylý – bizdiń elimizdiń turaqty damýy men adam kapitalyna investitsiia quiýdy bildiredi. Óitkeni, dál osyndai yntaly da igi nietti balalardan keleshekte úlken ózgerister jasai alatyn myqty urpaq shyǵady».
IQanat baǵdarlamasy túlekteriniń (Alumni) sany búginde 2200-den astam. Olar – jobanyń maqtanyshtary ári qozǵaýshy kúshi. Olimpiada, negizinen, dál osy túlekterdiń kúshimen ótkizilýde. Búginde stýdent atanǵan olardyń bári de birneshe jyl buryn osy joldy júrip ótken, testileýdiń qyr-syryn egjei-tegjei biledi. Olar uiymdastyrý jumystarynyń barlyq satysynda kómektesip jatyr: mektepterdi aralap, ózge balalarǵa baǵdarlama erejesin túsindiredi, tipti ózderi de test qabyldaidy. IQanat Alumni qoǵamdastyǵyn belsendi damytýda – túlekterdiń qatysýymen turaqty kezdesýler men belsendi sharalar ótkiziledi. Odan bólek, osy túlekterdiń bir bóligi IQanat qamqoryna alǵan mektep oqýshylaryna mentor bolyp jatyr.
2017 jyly irgesi qalanǵan ýaqyttan beri Olimpiada 240 myńnan astam aýyl balasyn qamtydy. Jyl saiyn jobaǵa QR Oqý-aǵartý ministrligi qoldaý kórsetedi.
Eske salaiyq, IQanat – qazaqstandyq kásipkerlerdiń áleýmettik bilim berý jobasy, ol aýyl balalaryna keń múmkindikter usynyp, olardyń ómirin túbegeili ózgertedi. Qordyń qyzmeti týraly tolyq aqparatty iqanat.kz saitynan jáne @iqanat.kz Instagram paraqshasynan alýǵa bolady.
