Iliias Jansúgirovtyń «Ótirik» atty biregei jyr jinaǵy tabyldy
Almaty qalasynyń turǵyny, kinorejisser Erbol Boranshaulynyń jeke kitaphanasynan Iliias Jansúgirovtiń 1927 jyly Máskeý baspasynan shyqqan «Ótirik» atty biregei óleńder jinaǵy tabyldy. Kitap murajai qoryna tapsyryldy. Ǵylymi qyzmetkerdiń sózine qaraǵanda, bul – Qazaqstandaǵy jalǵyz basylym. Tóte jazýmen terilgen týyndyny mýzei qyzmetkerleri aldaǵy ýaqytta kirillitsamen qaita basyp shyǵarýdy josparlap otyr. 1927 jyly Máskeýde 4500 taralymmen shyqqan kitapta aqynnyń shymshyma óleńderi de toptastyrylǵan.
Sharaǵa elimizdiń túkpir-túkpirinen iliiastanýshy ǵalymdar men stýdentter qatysty. Jiyn taqyryby aqynnyń ómiri men shyǵarmashylyǵyn talqylaýǵa arnaldy. Sonyń ishinde pedagogika ǵylymdarynyń kandidaty, dotsent Shara Qiiahmetova baiandama jasap, filolog mamandardy daiarlaý máselesi boiynsha buǵan deiingi zertteý jumystarynda anyqtalǵan birqatar qatelikterdi atap ótti.
– Batyr Qalmyrzaevtyń «Jansúgirov jáne «Qazaq» gazeti» atty maqalasynda osy basylymnyń 1914-1916 jyldar aralyǵyndaǵy sandarynda «Qaptaǵai» búrkenshik atymen jaryq kórgen jazbalar qamtylǵan. Olardyń deninde qazaqtardyń soǵysqa aralasýyn atap kórsetken Iliias Jansúgirovtiń imperialistik soǵystaǵy adamdar jáne soǵys salyqtaryn tóleý tóńireginde oi qozǵaidy. Alaida, bul maqalalar Bilál Súleevtiki. Óitkeni aqyn óziniń esteliginde 1921 jyly 22 naýryzda «Jas Alash» gazetinde jariialanǵan tuńǵysh jazbasyn «Zamandastarǵa joldaý» dep ataidy. Bul týraly «Jańa ádebiet» jýrnalynyń 1931 jylǵy 6-7 sanynda jariialanǵan ómirbaianynda da aitylady. Jansúgirov jazýdy 1920 jyly bastaǵanyn jazǵan, - deidi Sh.Qiiahmetova.
Baiandamada tarihi fotosýretterde beinelengen tulǵalardyń kim ekeni de saralandy. 1934 jyly Máskeýde túsirilgen fotosýrette Maksim Gorkii men Iliias Jansúgirovpen birge beinelengen áieldiń Lidiia Seifýllina dep atalatyny birneshe derekkózderde kórsetilgen. Alaida, Sh.Qiiahmetova sýrette Jansúgirovtiń áieli Fatima Ǵabitova beinelengenine bultartpas dálel keltirdi. Usynylǵan dálelder men muraǵattyq fotosýretter bul sáikestendirýge qatysty senimdi derekterdi usynady.
Plenarlyq otyrysqa ál-Farabi atyndaǵy QazUÝ-dyń professory, f.ǵ.d. Saýle Erjanova, f.ǵ.d., «Iliiastaný» ǵylymi-praktikalyq ortalyǵynyń meńgerýshisi professor Muratbek Imangazinov, f.ǵ.k., QazUqyzPÝ professorynyń m.a., Lázzat Ádilbekova qatysyp, Iliias shyǵarmalarynyń ǵylymi-teoriialyq máselelerin kóterdi.
Jiyn sońynda Sh.Qiiahmetovanyń «Iliiastaný» oqýlyǵynyń tusaýkeseri ótti.
