Baspana eń áýeli birinshi kezekte kópbalaly analarǵa, jas mamandarǵa, úi kezeginde turǵan aýdan turǵyndaryna «7-20-25» jáne «5-10-20» memlekettik baǵdarlamasymen berildi. Aýdan ákimi Baǵdat Qarasaev bul memleket basshysynyń áleýmettik máselege nazar aýdarýynyń jemisi ekenin alǵa tartty.
– Prezidentimiz Qasym-Jomart Toqaev eldi qoljetimdi baspanamen qamtamasyz etýdi kún tártibinen túsirgen emes. Mine, búgin uly mereke qarsańynda «Azar» jaýapkershiligi shekteýli seriktestigi salǵan kópqabatty turǵyn úi kesheniniń páterleri óz ielerin tapty, – dep, mundai igi shara aldaǵy ýaqytta jalǵasyn tabatynyn senimmen aitty.
Azattyq kúni baspany bolyp jatqandar táýelsizdikke táý etip, bul eń birinshiden derbestiktiń arqasy ekenin aitty.
Qýanyshqa kenelgender arasynda ómir sapary men eńbek saparyna jańadan shyqqan jastar da bar.
– Men baqytty jandardyń birimin. Sebebi meniń jańa pátermi bar. Men bul úige memlekettik baǵdarlamalar aiasynda qol jetkizdim. Tórt jyldan beri kezekte turdym. Táýelsizdik kúni qýanyshqa kelelip otyrmyn, – dep qýanyshyn jasyra almady jas maman Dana Qarjaýbekqyzy.
Almatydai megapoliske jaqyn ornalasqan Ile aýdany Almaty oblysyndaǵy eń iri aýdandardyń biri. Jyl saiyn halqynyń sany da artyp keledi. Búginde halqynyń sany 215 myńnan asyp ketken. Baspana kezeginde turǵandar sany tórt myńǵa jýyq. Biyl elý myń sharshydan asatyn baspana halyqqa berildi. Desede, qurylys salasy toqtaityn emes. Kelesi jyly alpys myń sharshy metr kóp qabatty úi men jeke úiler salý josparda bar eken.
– Aldaǵy jyly da osy «Azar» qurylys kompaniiasymen Boraldai kentinde taǵy da úsh kóp qabatty túrǵyn úi salynady. Júz on páter bolady. Úkimetten toqsan million úidiń jylýyna kárizine aqsha bólingen. Ol daiyn. Endi úidiń tek qurylysy júredi. Sodan keiin jobalyq-smetalyq qujaty daiyn úsh toǵyz qabatty 72 páterli úi salý josparda bar, – dedi aýdan basshysy Baǵdat Qarasaev.
Ashybulaq aýyldyq okrýgindegi №19 orta mekteptiń janyna salynǵan 300 oryndyqty japsarjai ashyldy. Bilim ordasynyń japsarjaiy zamanaýi jabdyqtarmen qamtylǵan. Aǵylshyn, himiia, fizika jáne informatika kabinetterimen qatar, uldar men qyzdarǵa arnalǵan eńbek páni kabinetteri, sport zal men ashana da salynypty. Sonymen qatar, ustazdarǵa arnalǵan májilis zaly da bar. Bul zalda kez kelgen is-sharalardy ótkizý úshin ustazdar men oqýshylarǵa barlyq jaǵdai jasalǵan. Aýdanda on toǵyz mektep úsh aýysymda oqyp jatyr eken. Biraq olardy sany qysqara bermek.
– Bizdiń aýdanymyzǵa jyl saiyn úsh jarym myń bala mektep tabaldyryǵyn attaidy. Sońǵy jyldary jańa jiyrma mektep salyndy. Úsh japsarjai salyndy. Onyń bireýi búgin ashylyp otyr.Taǵy da jeti mektep salynyp jatyr. Onyń tórteýi kelesi jyly birinshi qyrkúiekte ashylady. Taǵy úsheýi 2021 jyldyń jeltoqsan aiynda ashylady dep josparlanýda, – deidi Ile aýdany bilim bóliminiń basshysy Lázzat Kátkeeva.
Aýdan basshylyǵy tek qana biýdjetke ǵana bailanbai baspana salý jumystaryn jekelegen demeýshiler arqyly da jandandyrmaq. Máselen, keler jyly «Etalon» kompaniiasy on gektar jerge júz baspana salyp, kottedjder qalashyǵy boi kótermek.
