2026 jyldyń alǵashqy on aiynda sheteldik marketpleister men onlain-servister Qazaqstan biýdjetine 91,8 mlrd teńge qosylǵan qun salyǵyn aýdardy. Bul 2025 jyldyń tolyq qorytyndysyndaǵy kórsetkishten 34,2 mlrd teńgege kóp, dep habarlaidy dalanews.kz.
Qarjy ministrligi Memlekettik kirister komitetiniń málimetinshe, 2022 jyldan beri sheteldik internet-kompaniialardan túsken QQS kólemi 219,1 mlrd teńgege jetken. Salyq túsimi jyl saiyn artyp keledi. Atap aitqanda, 2022 jyly biýdjetke 10,4 mlrd teńge, 2023 jyly – 24,3 mlrd teńge, 2024 jyly – 35 mlrd teńge, al 2025 jyly 57,6 mlrd teńge aýdarylǵan. 2026 jylǵy 1 qarashadaǵy jaǵdai boiynsha túsim 91,8 mlrd teńgeni qurady.
Qazaqstanda QQS tóleýshi retinde tirkelgen sheteldik kompaniialardyń sany 144-ke jetti. Biylǵy on aidyń ózinde bul tizimge taǵy 24 kompaniia qosylǵan.
Olardyń qatarynda Apple, Amazon, AliExpress, Alibaba, Google, Meta, Microsoft, Netflix, OpenAI, Ozon, Pinduoduo, Temu, TikTok, Samsung jáne Sony sekildi halyqaralyq kompaniialar bar. Qytailyq Pinduoduo marketpleisiniń ózi Qazaqstan biýdjetine 6,8 mlrd teńge salyq tólegen.
Memlekettik kirister komiteti shetelden jeke paidalaný úshin tapsyrys beriletin taýarlarǵa qoiylatyn bajsyz ákelý talaptaryn da eske saldy. Eýraziialyq ekonomikalyq odaq erejesine sáikes, sálemdemeniń quny 200 eýrodan, al salmaǵy 31 keliden aspaýǵa tiis.
Taýardyń baǵasy belgilengen shekten joǵary bolǵan jaǵdaida, satyp alýshy artyq somanyń 15 paiyzy kóleminde kedendik tólem jasaidy. Al salmaq limiti assa, árbir artyq keli úshin keminde 2 eýro esepteledi.
Mysaly, salmaǵy talapqa sai, biraq quny 300 eýro bolatyn taýar úshin tólem barlyq somadan emes, limitten asqan 100 eýrodan ǵana alynady.
Salyq kodeksinde tiisti kedendik tólemder jasalǵan taýar qunynyń bir bóligine QQS eseptemeý qarastyrylǵan. Alaida komitet Pinduoduo arqyly berilgen jekelegen tapsyrystarǵa bul tártiptiń qalai qoldanylatynyn jáne salyq qaitalap eseptelgen jaǵdaida satyp alýshynyń ne isteýi kerektigin naqtylamaǵan.
Sheteldik internet-kompaniialardyń salyq tólemderin baqylaý úshin ekinshi deńgeili bankter olardyń paidasyna jasalǵan aqsha aýdarymdary týraly málimetti salyq organdaryna usynady. Komitet bul aqparatty kompaniialar tólegen salyq kólemimen salystyrady.
Sáikessizdik anyqtalsa, platformaǵa kameraldyq baqylaý qorytyndysy boiynsha habarlama joldanady. Kompaniiaǵa aiyrmashylyqty joiý úshin 30 jumys kúni beriledi. Talap oryndalmaǵan jaǵdaida, onyń internet-resýrsyna Qazaqstan aýmaǵynda kirý shektelýi múmkin.
Mundai jaǵdai 2026 jyldyń qazan aiynda tirkelgen. Kameraldyq baqylaý jónindegi habarlamany oryndamaǵan Farfetch halyqaralyq saýda platformasynyń jumysyna Qazaqstanda shekteý qoiylǵan.