"Ákeler odaǵy" respýblikalyq qoǵamdyq birlestiginiń Astana qalasyndaǵy filialynyń tóraǵasy, qalalyq Qoǵamdyq keńestiń múshesi Bekdaiyr Nyǵmetuly Qazaqstanda energetikalyq sýsyndardy óndirýge, importtaýǵa jáne satýǵa tolyq tyiym salýdy usyndy. Osy maqsatta qoǵamdyq birlestik ókilderi arnaiy petitsiia jariialaǵan, dep habarlaidy dalanews.kz.
Bastama avtorlary energetikalyq sýsyndardy internet pen jetkizý qyzmetteri arqyly satýǵa, sondai-aq olardy jarnamalaýǵa da shekteý engizýdi talap etip otyr.
"Biz, “Ákeler odaǵy” qoǵamdyq birlestiginiń ókilderi, Qazaqstanda energetikalyq sýsyndardy óndirýge, kommertsiialyq maqsatta ákelýge jáne satýǵa tolyq tyiym salýdy usynamyz. Bizdiń ustanymymyz aiqyn: halyqtyń densaýlyǵy – bárinen qymbat", – dedi Bekdaiyr Nyǵmetuly.
Ol 2025 jyldan bastap elimizde energetikalyq sýsyndardy 21 jasqa tolmaǵan azamattarǵa satýǵa tyiym salynǵanyn, al 2026 jyldan bul ónimderge aktsiz engizilgenin atap ótti. Alaida birlestik ókilderi qabyldanǵan sharalar máseleni tolyq sheshpeidi dep esepteidi.
Petitsiia avtorlarynyń málimdeýinshe, energetikalyq sýsyndardy shamadan tys ári turaqty tutyný eresekterdiń densaýlyǵyna da qaýip tóndirýi múmkin. Olar klinikalyq zertteýlerge súienip, mundai sýsyndardy ishkennen keiin deni saý adamnyń ózinde qan qysymy ýaqytsha joǵarylaýy yqtimal ekenin alǵa tartty. Sondai-aq kofeindi únemi qoldaný táýeldilik qalyptastyrýy múmkin ekenin aitty.
"Sharshaýdy basý nemese uiqyny ashý úshin energetikalyq sýsyn ishýdi ádetke ainaldyrý bizdi alańdatady. Onyń uzaq merzimdi yqtimal saldaryna da nazar aýdarý qajet", – dedi bastama ókili.
Qoǵamdyq birlestik Úkimetten energetikalyq sýsyndardy óndirýge, elge kommertsiialyq maqsatta ákelýge, kóterme jáne bólshek saýdada ótkizýge tolyq tyiym salatyn zań jobasyn ázirleýdi surady. Usynys internet-dúkender men jetkizý qyzmetteri arqyly satýdy jáne jarnamany da qamtidy.
Sonymen qatar bastama avtorlary zań talaptaryn buzǵan tulǵalarǵa jaýapkershilik belgileýdi usyndy.
"Búgingi qoldaýymyz erteńgi urpaǵymyzdyń densaýlyǵyna qyzmet etsin. Otbasy saýlyǵyn birge qorǵaiyq", – dep Bekdaiyr Nyǵmetuly qazaqstandyqtardy petitsiiany qoldaýǵa shaqyrdy.