İshki ister mınıstrligi azamattardyń smartfondaryna zıandy qosymshalar ornatý arqyly qashyqtan qol jetkizetin alaıaqtyq shemalar kóbeıgenin málimdedi, dep habarlaıdy Dalanews.kz

Vedomstvonyń habarlaýynsha, qazirgi ýaqytta Android operasıalyq júıesi ornatylǵan mobıldi qurylǵylarǵa zıandy baǵdarlamalardy ornatyp, taratý faktileri tirkelgen. Qaskóıler túrli tásilderdi qoldanady. Atap aıtqanda:

– messendjerler men áleýmettik jeliler arqyly fıshıngtik siltemeler taratý;
– jalǵan mobıldi qosymshalar usyný;
– foto, beıne jáne qujat túrinde jasyrylǵan zıandy faıldar jiberý;
– memlekettik organdar, bankter jáne jetkizý qyzmetteri atynan habarlama joldaý;
– aksıaǵa nemese utys oıynyna qatystyrý syltaýymen qosymsha ornatýdy talap etý.

Mamandardyń aıtýynsha, mundaı baǵdarlama ornatylǵannan keıin alaıaqtar qurylǵyǵa qashyqtan qol jetkizip, bank shottaryndaǵy qarajatty urlaýy, onlaın-nesıeler rásimdeýi, jeke derekter men hat almasýdy taratýy múmkin. Sondaı-aq telefondy buǵattap, tólem talap etý qaýpi bar.

İİM azamattardy saq bolýǵa shaqyrady. Ózińizdi qorǵaý úshin:

– úshinshi tulǵalardyń ótinishimen qosymsha ornatpaý;
– SMS arqyly kelgen kodtardy eshkimge habarlamaý;
– kúmándi siltemelerge ótpeý;
– tek resmı qosymshalar men antıvırýstyq baǵdarlamalardy paıdalaný;
– bank operasıalary týraly habarlamalardy qosý usynylady.

Telefonda qaýipti baǵdarlama bar ekenin bildiretin belgiler – batareıanyń tez taýsylýy, qurylǵynyń qyzýy jáne beıtanys qosymshalardyń paıda bolýy.

«Kúdik týyndaǵan jaǵdaıda ınternetti dereý óshirip, bankpen baılanysyp, quqyq qorǵaý organdaryna júginińizder. Saq bolyńyzdar. Sıfrlyq qaýipsizdik ózimizden bastalady», – dep málimdedi İİM.