Elimizdegi referendým ýchaskeleriniń eshqaisynda qoǵamdyq tártipti óreskel buzý deregine jol berilmegen, dep habarlaidy Dalanews.kz.
Búgin politsiia qyzmetkerleri elimiz boiynsha respýblikalyq referendýmnyń qaýipsiz ótýin qamtamasyz etti. QR IIM daýys berý aiaqtalǵannan keiin de qoǵamdyq tártipti qamtamasyz etýdi jalǵastyrdy. Bul týraly "Referendým – 2026" onlain marafony aiasynda OKQ alańynda ótken brifing barysynda QR IIM resmi ókili Shyńǵys Álekeshev habarlady.
Onyń aitýynsha, sailaý komissiialarynyń, baiqaýshylardyń qaýipsiz jumys isteýine jáne azamattardyń óz tańdaýyn erkin túrde jasaýyna barlyq jaǵdai jasalǵan.
"Elimizdegi 10 myńnan asa referendým ýchaskesiniń eshqaisynda qoǵamdyq tártipti óreskel buzý deregine jol berilmedi. Qazir ýchaskelerde daýystardy sanaý jumystary júrip jatyr. Jaǵdai turaqty jáne politsiianyń tolyq baqylaýynda. Daýystardy sanaý aiaqtalǵannan keiin politsiia qyzmetkerleri biýlletender men hattamalardy óńirlik komissiialarǵa qaýipsiz jetkizýdi qamtamasyz etedi", - dedi ol.
