Ydyrysovqa qysym jasalǵan joq
«Áleýmettik jelide «Radiotochka» saitynyń bas redaktory B.Ydyrysovqa tergeý organdary tarabynan qysym jasaldy dep taraǵan aqparattyń shyndyqqa janaspaityndyǵyn habarlaimyz», - delingen qalalyq prokýratýranyń QazAqparattyń resmi saýalyna orai bergen jaýabynda.
Vedomstvonyń atap ótýinshe, tergeý organdary B.Ydyrysovty B.Ǵabdýllinge qatysty qylmystyq is boiynsha kýáger retinde QR QK 420 jáne 421 baptaryn saqtai otyryp tergegen jáne jalǵan kýálik bergeni ári kýálik berýden bas tartqany úshin jaýapkershilik bar ekendigin eskertken.
B.Ydyrysovqa qatysty quqyq qorǵaý organdary tarabynan qylmystyq qýdalaý bolǵan joq jáne oǵan izdeý jariialanbaǵan da.
Aita keteiik, Radiotochka.kz saitynyń bas redaktory Bekjan Ydyrysov óziniń Feisbýktegi paraqshasynda CentralAsiaMonitor bas redaktory ári Radiotochka.kz direktory Bigeldi Ǵabdýllinniń isine bailanysty tergeý organdary ózine qysym jasaǵandyǵyn, sondyqtan Qazaqstannan ketkendigin jazǵan bolatyn.
Esterińizge sala keteiik, ótken jyldyń 16 qarashasynda Astana qalasy Almaty aýdandyq №2 sotynyń sanktsiiasymen Bigeldi Ǵabdýllin tutqynǵa alyndy. Ol óz quzyryndaǵy buqaralyq aqparat quraldaryn paidalanyp, memlekettik organ jetekshileriniń iskerlik abyroiyna nuqsan keletin materialdardy jariialaý arqyly olarǵa aqparattyq shabýyl jasaǵan.
Aldaǵy ýaqytta synaýdy toqtatý úshin Ǵadbýllin laýazymdy tulǵalardan óz media resýrstaryna memlekettik tapsyrystar talap etken. Olar óz kezeginde Ǵabdýlinniń kompaniiasyn qolpashtap, memlekettik satyp alýlar týraly kelisimsharttar bekitýdi qamtamasyz etken. Osydan keiin ǵana olardyń qyzmeti týraly tek jaǵymdy materialdar jariialanyp otyrǵan.
Máselen, Jambyl oblysy ákimdiginen Ǵabdýllin 10 million teńge kólemindegi qarajat bopsalaǵan. Dál osy shemamen 7 memlekettik organ Ǵabdýllinge memlekettik tapsyrys alyp bergen.
