Jasandy intellekt adamnyń oi eńbegine ǵana emes, fizikalyq jumysyna da birtindep aralasyp keledi. HR jáne memlekettik qyzmet salasyndaǵy Qazaq Expert Club sarapshysy Asqar Esimseiitovtiń aitýynsha, robototehnika damyǵan saiyn bul jaǵdai santehnik, elektrik jáne qurylysshy siiaqty mamandyqtarǵa da áser etýi múmkin, dep habarlaidy dalanews.kz.
Buǵan deiin JI krandy qalai jóndeý keregin túsindirip nemese aqaýdy anyqtaýǵa kómekteskenimen, jumysty adamnyń ózi atqaratyn. Qazir robottar kamera arqyly ainalany baqylap, JI kómegimen jaǵdaidy taldap, zattarmen fizikalyq áreket jasai alady.
Sarapshynyń sózinshe, ámbebap robottar ázirge adamdy tolyq almastyrýǵa daiyn emes. Alaida olardyń múmkindigi tez damyp keledi.
"Digital Bridge 2026 forýmynda robottar bir jyl ishinde aitarlyqtai jetilgenin kórdim. Bir robot ústel tennisinde dopty qaǵyp jatsa, ekinshisi fýtbol oinap júr. Olar osyndai qarqynmen dami berse, aldaǵy ýaqytta fizikalyq jumystardy da oryndaýy múmkin", - deidi Esimseiitov.
Sarapshynyń pikirinshe, JI barlyq mamandyqty joiyp jibermeidi. Biraq belgili bir jumysty oryndaýǵa qajet adam sany men ýaqytyn azaitýy múmkin. Bul úrdis tsifrlyq saladan keiin fizikalyq eńbekke de áser etýi yqtimal.
Sondyqtan ol qolmen jumys isteitin mamandarǵa zamanaýi jabdyqtar men tsifrlyq quraldardy meńgerýge keńes beredi. Bolashaqta tek jumysty oryndaý emes, aqaýdyń sebebin anyqtap, sheshim taýyp, nátijeni teksere alý mańyzdy bolmaq.
