Pavlodar oblysy boiynsha Qarjylyq monitoring agenttigi «HAS» qarjy piramidasynyń qyzmetinen zardap shekken azamattardyń aryzdary negizinde jańa epizodtar boiynsha sotqa deiingi tergep-tekserýdi bastady, dep habarlaidy Dalanews.kz.
Agenttik málimetinshe, buǵan deiin sot qarjylyq piramidany uiymdastyrýshylardy 6 jyldan 12 jylǵa deiin bas bostandyǵynan aiyrýǵa úkim shyǵarǵan. Jábirlenýshilerge keltirilgen zalaldy óteý úshin salymshylardyń qarajatyna satyp alynǵan, jalpy quny 1,2 mlrd teńgeden asatyn múlik óndirip alýǵa jiberilgen.
Tárkilengen aktivterdiń qatarynda 4 páter, 18 avtokólik, 3 jer ýchaskesi, avtoturaq oryndary, turǵyn emes úi-jai jáne bank shottaryndaǵy aqshalai qarajat bar. Osy ýaqytqa deiin sot oryndaýshylary jábirlenýshilerge 300 mln teńge kóleminde tólem júrgizgen.
Qazirgi tańda jalpy shyǵyn somasy 821 mln teńgeden asatyn 125-ten astam jábirlenýshiden aryz túsken.
Tergeý barysynda salymshylardyń aqshasyna elorda aýmaǵynda ornalasqan, quny 525 mln teńge bolatyn jer ýchaskelerimen birge A.D.A.M. group JShS satyp alynǵany anyqtalǵan. Atalǵan múlik ony jasyrý maqsatynda úshinshi tulǵanyń atyna rásimdelgen. Sot sanktsiiasymen bul aktivterge tyiym salyndy.
2026 jylǵy 6 qańtarda kúdiktilerdiń áreketteri qaita saralanyp, olarǵa uiymdasqan qylmystyq top qurý jáne oǵan basshylyq etý, qarjylyq piramidany uiymdastyrý jáne jarnamalaý, sondai-aq qylmystyq jolmen alynǵan aqsha men múlikti zańdastyrý baptary boiynsha aiyp taǵyldy.
Tergeý jalǵasyp jatyr. Qarjylyq monitoring agenttigi «HAS» qarjy piramidasynan zardap shekken azamattardy aýmaqtyq bólimshelerge júginýge shaqyrdy.
