پاۆلودار وبلىسى بويىنشا قارجىلىق مونيتورينگ اگەنتتىگى «HAS» قارجى پيراميداسىنىڭ قىزمەتىنەن زارداپ شەككەن ازاماتتاردىڭ ارىزدارى نەگىزىندە جاڭا ەپيزودتار بويىنشا سوتقا دەيىنگى تەرگەپ-تەكسەرۋدى باستادى، دەپ حابارلايدى Dalanews.kz.
اگەنتتىك مالىمەتىنشە، بۇعان دەيىن سوت قارجىلىق پيراميدانى ۇيىمداستىرۋشىلاردى 6 جىلدان 12 جىلعا دەيىن باس بوستاندىعىنان ايىرۋعا ۇكىم شىعارعان. جابىرلەنۋشىلەرگە كەلتىرىلگەن زالالدى وتەۋ ءۇشىن سالىمشىلاردىڭ قاراجاتىنا ساتىپ الىنعان، جالپى قۇنى 1،2 ملرد تەڭگەدەن اساتىن مۇلىك ءوندىرىپ الۋعا جىبەرىلگەن.
تاركىلەنگەن اكتيۆتەردىڭ قاتارىندا 4 پاتەر، 18 اۆتوكولىك، 3 جەر ۋچاسكەسى، اۆتوتۇراق ورىندارى، تۇرعىن ەمەس ءۇي-جاي جانە بانك شوتتارىنداعى اقشالاي قاراجات بار. وسى ۋاقىتقا دەيىن سوت ورىنداۋشىلارى جابىرلەنۋشىلەرگە 300 ملن تەڭگە كولەمىندە تولەم جۇرگىزگەن.
قازىرگى تاڭدا جالپى شىعىن سوماسى 821 ملن تەڭگەدەن اساتىن 125-تەن استام جابىرلەنۋشىدەن ارىز تۇسكەن.
تەرگەۋ بارىسىندا سالىمشىلاردىڭ اقشاسىنا ەلوردا اۋماعىندا ورنالاسقان، قۇنى 525 ملن تەڭگە بولاتىن جەر ۋچاسكەلەرىمەن بىرگە A.D.A.M. group ج ش س ساتىپ الىنعانى انىقتالعان. اتالعان مۇلىك ونى جاسىرۋ ماقساتىندا ءۇشىنشى تۇلعانىڭ اتىنا راسىمدەلگەن. سوت سانكسياسىمەن بۇل اكتيۆتەرگە تىيىم سالىندى.
2026 جىلعى 6 قاڭتاردا كۇدىكتىلەردىڭ ارەكەتتەرى قايتا سارالانىپ، ولارعا ۇيىمداسقان قىلمىستىق توپ قۇرۋ جانە وعان باسشىلىق ەتۋ، قارجىلىق پيراميدانى ۇيىمداستىرۋ جانە جارنامالاۋ، سونداي-اق قىلمىستىق جولمەن الىنعان اقشا مەن مۇلىكتى زاڭداستىرۋ باپتارى بويىنشا ايىپ تاعىلدى.
تەرگەۋ جالعاسىپ جاتىر. قارجىلىق مونيتورينگ اگەنتتىگى «HAS» قارجى پيراميداسىنان زارداپ شەككەن ازاماتتاردى اۋماقتىق بولىمشەلەرگە جۇگىنۋگە شاقىردى.
