"Halyq" qaıyrymdylyq qory Halyk Bank-pen birige otyryp, Atyraý oblysy Qulsary qalasyndaǵy sý tasqynynan zardap shekken turǵyndarǵa ataýly qarjylaı kómek kórsete bastady. Qordyń negizin qalaýshy, belgili mesenat Tımýr Qulybaev 31,4 mlrd teńge aýdardy.

«Sý tasqynynan zardap shekken árbir jannyń qaıǵysyna ortaqpyn. Apat kelgeli, alǵashqy kúnnen bastap qarǵyn sýdyń astynda qalǵan aımaqtarǵa kómek qolyn sozdyq. Prezıdentimiz Qasym-Jomart Kemeluly Toqaevtyń basshylyǵymen barlyq qıyndyqty eńseretinimizge senimdimin», - dedi Tımýr Qulybaev.

Aıta keteıik, bul kómek Qulsary turǵyndarynyń jeke úılerin qalpyna keltirýge baǵyttalyp otyr. Keltirilgen zalalǵa táýelsiz sarapshylar baǵa beredi. Tizimdi ákimdikterdiń jedel shtaby zardap shekkenderden alynǵan ótinishter negizinde daıyndaıdy.

Eske sala keteıik, osyǵan deıin "Halyq" qory men Halyk Bank óz qarajatynan Aqtóbe, Qostanaı, Batys Qazaqstan, Aqmola, Atyraý, Qaraǵandy, Soltústik Qazaqstan, Túrkistan, Almaty, Pavlodar, Ulytaý jáne Abaı oblystaryndaǵy sý tasqynynan zardap shekkenderge kómek kórsetý úshin qyzmetkerlerdiń bir kúndik jalaqysyn qosqanda 1 mlrd 445 mln teńge bólgen bolatyn. Sonymen qatar, "Halyq" qorynyń negizin qalaýshy Tımýr Qulybaev Atyraý oblysyn qalpyna keltirýge qosymsha 30 mlrd teńge bólý týraly sheshim qabyldady. Osylaısha, sý tasqynynan zardap shekkenderge 31,4 mlrd teńgeden asa aqsha  bólindi.