Sýdia sotqa qatysyp otyrǵan Gúlmira Satybaldynyń týystaryna eskertý jasady, - dep habarlaidy Dalanews.kz Tengrinews.kz-ke siltep.
Almatynyń qylmystyq soty Gúlmira Satybaldyǵa qatysty biznes seriktesin bopsalady jáne qamap ustady degen aiyppen isti áli de qarap jatyr. Sot barysynda zardap shekken kásipkerdiń advokaty jábirlenýshi Satybaldymen birge ielik etetin seriktestiktiń kadrlar bóliminiń basshysyna suraqtar qoidy. Advokat sottalýshynyń kompaniiadaǵy kómekshileri týraly suraqty birneshe ret qaitalady.
"Men narazymyn, ol adamdardy shaqyryp, suraq qoiý kerek", - dedi Satybaldy kútpegen jerden jábirlenýshiniń advokatyna.
Aiyptalýshynyń qorǵaýshylary advokat bir suraqty qaitalai beretinin jetkizdi. Osy kezde zalda otyrǵandardyń daýysy estildi.
"Qurmetti sot, eskertý berińizshi! Bireýi uiyqtap, qulap otyr (buǵan deiin bir er adam oryndyqtan qulaǵan - esk.), tártip buzady, ekinshisi ashýlanyp, óz pikirin aityp otyr. Olardy sot zalynan shyǵarýdy suraimyn, olar kedergi jasaidy nemese eskertý jasańyz. Olar qatty sóilep otyr", - dep jábirlenýshiniń advokaty sýdiaǵa.
Sýdia advokattyń eskertýine kelisti.
"Bul - ashyq protsess, biraq bul tártipti buzýǵa bolady degendi bildirmeidi. Qazir osy jerde otyrǵan azamattarǵa, jankúierlerge (sottalýshyny qoldaityn adamdarǵa - esk.) aityp turmyn. Taǵy da aitamyn: tártipti buzbaý ózderińiz úshin kerek. Eger qorǵaýshy taraptan shaǵym tússe, shara qoldanamyn, barlyq týysyn sot zalynan shyǵaramyn, bul bos sóz emes, men zańdy oqyp otyrmyn", - dedi sýdia Mártpek Kákimjanov.
Buǵan deiin Almatynyń qylmystyq ister jónindegi sotynda Gúlmira Satybaldynyń isi boiynsha aldyn ala tyńdaý ótti. Sottyń aldyn ala tyńdaýy kezinde Gúlmira Satybaldy alqabiler sotynan bas tartty.
Sottalýshy oryndyǵynda Gúlmira Satybaldymen qosa, onyń júrgizýshisi Mádi Batyrshaev ta boldy. Sot otyrysy onlain rejimde ótti, al aiyptalýshylar Astananyń tergeý izoliatorynda boldy. Artynsha olar Almatyǵa jetkiziletini belgili boldy.
Gúlmira Satybaldyǵa Qylmystyq kodekstiń 126-baby "Zańsyz bas bostandyǵynan aiyrý" boiynsha aiyppen qosa, asa aýyr qylmys jasady degen aiyp taǵyldy: Qylmystyq kodekstiń 194-babynyń 3-bóligi "Iri mólsherde múlik alý maqsatynda jasalǵan qorqytyp alýshylyq". Bul bap asa aýyr bolyp esepteledi jáne ol boiynsha aiyptalýshy alqabilerdiń qatysýymen sot ótkizýdi suraýyna quqyly.
Buǵan deiin Gúlmira Satybaldy men onyń qaramaǵyndaǵylarǵa taǵy bir is boiynsha úkim shyqqan edi. Ol adam urlaǵany men ozbyrlyq jasaǵany úshin kináli dep tanyldy.
